رہنما پی ٹی آئی رؤف حسن کا نام پاسپورٹ کنٹرول لسٹ سے نکالنے کا حکم
اسلام آباد ہائی کورٹ نے پاکستان تحریک انصاف (پی ٹی آئی) کے مرکزی سیکریٹری اطلاعات رؤف حسن کا نام پاسپورٹ کنٹرول لسٹ (پی سی ایل) سے نکالنے کا حکم دے دیا۔
ڈان نیوز کے مطابق اسلام آباد ہائی کورٹ نے رؤف حسن کا نام پی سی ایل میں شامل کرنے کا حکم غیر قانونی اور بدنیتی پر مبنی قرار دیا، جسٹس انعام امین منہاس نے رؤف حسن کا نام سفری پابندی کی فہرست سے نکالنے کی درخواست منظور کرلی۔
فاضل جج نے رؤف حسن کو بیرون ملک سفر کی اجازت کے لیے ٹرائل کورٹ سے رجوع کی ہدایت کردی، اور ٹرائل کورٹ کو حکم دیا کہ رؤف حسن کی درخواست پر قانون کے مطابق جلد فیصلہ کیا جائے۔
عدالت عالیہ نے کہا کہ وکیل کے مطابق رؤف حسن کینسر سروائیور ہیں، جنہیں چیک اپ کے لیے برطانیہ جانا ہے، پٹیشنر کے خلاف وفاقی تحقیقاتی ادارے (ایف آئی اے) میں مقدمہ درج ہے جس میں وہ ضمانت پر رہا ہیں، وکیل نے دلائل دیے کہ محض مقدمہ درج ہونے پر کسی کا نام پاسپورٹ کنٹرول لسٹ میں شامل کرنا بلا جواز ہے۔
اسلام آباد ہائی کورٹ نے کہا کہ وکیل کا کہنا ہے کہ رؤف حسن کا ہر 6 ماہ بعد برطانیہ میں چیک اپ ہوتا ہے، عدالت کو بتایا گیا کہ ایف آئی اے نے 24 جولائی 2024 کو پٹیشنر کا نام پی سی ایل میں شامل کرنے کی سفارش کی تھی، ڈائریکٹر جنرل (ڈی جی) امیگریشن اینڈ پاسپورٹس نے 26 اگست 2024 کو نام پی سی ایل میں شامل کر دیا تھا۔
عدالت عالیہ نے کہا کہ کرمنل کیس زیر التوا یا تفتیش جاری ہونا پٹیشنر کا نام پی سی ایل میں شامل کرنے کا جواز نہیں ہے، پٹیشنر اپنے خلاف درج مقدمے میں ضمانت پر ہے اور ریاست نے ضمانت منسوخی دائر نہیں کی۔
جسٹس انعام امین منہاس نے کہا کہ وفاقی حکومت سے رؤف حسن پر سفری پابندیاں عائد کرنے کی منظوری نہیں لی گئی، پاسپورٹ رولز کے مطابق ملک میں داخلے اور روانگی کو ریگولیٹ کرنے کی اتھارٹی وفاقی حکومت کے پاس ہے۔
دلائل سننے کے بعد فاضل جج نے رؤف حسن کا نام پاسپورٹ کنٹرول لسٹ سے نکالنے کا حکم دے دیا۔
لائیو ٹی وی