ترک صدر کی شکایت پر سگریٹ نوش کو جرمانہ
استنبول:ایک دہائی سے زائد عرصہ تک وزیر اعظم رہنے والے رجب طیب اردوغان نے اگست میں صدر بننے کے بعد وعدہ کیا تھا کہ وہ ایک سرگرم صدر ہوں گے۔
لیکن بہت کم لوگوں کو اندازہ تھا کہ وہ استنبول کی ایک مصروف سڑک پر انسداد تمباکو نوشی کے قانون پر عمل درآمد کیلئے انتہائی سنجیدہ ہو جائیں گے۔
اتوار کو تقریر کرنے کے بعد اردوغان استنبول کے علاقے سینلر سے گزرتے ہوئے اپنے مداحوں کو ہاتھ لہرا کر جواب دے رہے تھے جب انہوں نے ایک کیفے کی دوسری منزل پر بالکونی میں ایک شخص کو سگریٹ پیتے ہوئے دیکھا۔
اس واقعہ کی آن لائن جاری ہونے والی وڈیو میں دکھایا گیا کہ اردوغان رکے اورسگریٹ پینے والے شخص کی جانب اشارہ کرتے ہوئے کہنے لگے کہ وہ قانون کی خلاف ورزی کر رہا ہے۔
انہوں نے سگریٹ پینے والے سے کہا کہ 'اس حرکت پر جرمانہ عائد ہوتا ہے'۔
اس کے بعد اردوغان سینلر کے میئر کی جانب مڑے اور ان سے پوچھا کہ پولیس کہاں ہے؟ اس وقت تک مسکرا رہے میئر کو یک دم اندازہ ہوا کہ صدر بہت زیادہ سنجیدہ ہیں۔
اردوغان نے میئر سے کہا ' آپ جانتے ہیں کہ یہ غلط ہو رہا ہے۔یہ شخص انتہائی غلط رویہ اپنائے ہوئے ہے۔ یہ بے شرم، صدر کے منع کرنے کے باوجود آرام سے بیٹھا سگریٹ پی رہا ہے۔ خدا کے واسطے یہ محرم کا مہینہ ہے'۔
مقامی میڈیا کے مطابق، اس پر استنبول کے میئر قادر توپباز نے معاملہ رفع دفع کرنے کیلئے تجویز دی کہ یہ شخص دوبارہ ایسی حرکت نہ کرنے کا وعدہ کرے لیکن اردوغان ٹھنڈے نہ ہوئے ۔
ترک میڈیا نے بتایا کہ اردوغان کے جانے کے بعد پولیس نے اس شخص پر 90 ترکش لیرا (40 ڈالرز) کا جرمانہ عائد کر دیا۔
یاد رہے کہ ترک حکومت نے 2009 میں ایک قانون کے ذریعے تمامی سرکاری عمارات، کیفیز، بارز، ریستورانوں میں سگریٹ نوشی پر پابندی لگا دی تھی۔
نقاد کافی عرصہ سے اردوغان پر لوگوں کے طرز زندگی پر اثر انداز ہونے اور سرکاری طور پر سیکولر ملک کو اسلامی بنانے کی کوششوں پر انہیں تنقید کا نشانہ بناتے آ رہے ہیں۔
اردوغان تمباکو سے سخت نفرت کرتے ہیں اور ایک مرتبہ انہوں نے کہا تھا کہ تمباکو نوشی دہشت گردی سے زیادہ بڑا خطرہ ہے۔
جولائی میں اسی سے ملتے جلتے ایک واقعہ میں اردوغان نے قومی فٹبال ٹیم کے ایک نوجوان کھلاڑی کو بازو پر ٹیٹو کی وجہ سے ڈانٹتے ہوئے خبردار کیا تھا کہ اس سے صحت کو نقصان پہنچ سکتا ہے ۔
لائیو ٹی وی