خیبر ایجنسی: فضائی کارروائی میں 19 'دہشت گرد' ہلاک
خیبر ایجنسی: وفاق کے زیرِ انتظام قبائلی علاقے خیبر ایجنسی کے علاقوں سینڈپل اور آکا خیل میں فضائی کارروائی کے نتیجے میں کم از کم 19 مبینہ شدت پسند ہلاک ہوگئے۔
نمائندہ ڈان ڈاٹ کام نے آئی ایس پی آر ترجمان کے حوالے سے بتایا ہے کہ ہلاک ہونے والے مبینہ دہشت گردوں میں ایک اہم کمانڈر بھی شامل ہے۔
سیکیورٹی فورسز کی حالیہ فضائی کارروائی کے نتیجے میں تباہی پھیلانے والے ہتھیاروں سمیت دہشت گردوں کے 5 مبینہ ٹھکانے بھی تباہ ہوئے۔
خیبر ایجنسی کے علاقے سپاہ کو لشکرِ اسلام کا مضبوط گڑھ تصور کیا جاتا ہے، جبکہ آکا خیل اور ملک دین کے علاقوں میں بھی دہشت گردوں کے ٹھکانے موجود ہیں۔
واضح رہے کہ خیبر ایجنسی کی تحصیل باڑہ میں جاری سیکورٹی فورسز کے آپریشن میں تیزی آگئی ہے اور وادیٔ تیراہ میں مبینہ دہشت گردوں کے ٹھکانوں کی جانب سیکورٹی فورسز کی پیش قدمی بھی تیز ہوگئی ہے۔
ان کارروائیوں کو ’آپریشن خیبر ون‘ کا نام دیا گیا ہے، جس کی تجویز وزیراعظم نواز شریف کی زیر صدارت ہونے والے اجلاس کے دوران دی گئی تھی۔
یاد رہے کہ سکیورٹی فورسز کی جانب سے شمالی وزیرستان میں 15 جون کو آپریشن ضربِ عضب کا آغاز کیا گیا تھا اور علاقے میں آزاد میڈیا کی رسائی نہ ہونے کی وجہ سے تمام تر تفصیلات آئی ایس پی آر کی جانب فراہم کی جاتی ہیں۔
تاہم فوج کی جانب سے آپریشن کے آغاز کے بعد ایک مرتبہ ملکی اور غیرملکی میڈیا کو تحصیل میرعلی کا دورہ کروایا گیا تھا۔
شمالی وزیرستان کی تحصیل میرعلی کو دہشت گردوں سے خالی کروانے کے بعد سیکیورٹی فورسز نے آپریشن کا دائرہ کار شمالی وزیرستان کے دوردراز علاقوں تک بڑھا دیا ہے۔
اور اب خیبر ایجنسی اور ملحقہ علاقوں میں ’آپریشن خیبر ون‘ کے تحت سیکیورٹی فورسز نے اپنی کارروائیاں مزید تیز کردی ہیں۔
لائیو ٹی وی