'پشاورزلمی کے ڈریسنگ روم میں مداح داخل ہونے کا انکشاف'
پاکستان سپر لیگ (پی ایس ایل) 2017 کے فائنل میں پشاورزلمی کی نمائندگی کرنے والے انگلش بلےباز ڈیوڈ ملان نے انکشاف کیا ہے کہ سخت سیکیورٹی کے باوجود ایک مداح ٹیم کے ڈریسنگ روم میں داخل ہوگیا۔
کرک انفو کو ایک انٹرویو میں ڈیوڈ ملان نے کہا کہ 'یہ باعث تشویش تھا کہ تمام سختی کے باوجود ایک مداح باآسانی اندر داخل ہوا'۔
ملان نے کہا کہ 'نوجوان مداح اس وقت ڈریسنگ روم میں داخل ہوا جب تمام کھلاڑی اندر آرہے تھے اور کسی طرح وہ بھی آنے میں کامیاب ہوا'۔
خیال رہے کہ پی ایس ایل کے راؤنڈ اور پلے آف میچوں میں شامل اکثر غیرملکی کھلاڑی سیکیورٹی خدشات کے باعث لاہور آنے سے انکار کرچکے تھے تاہم ڈیوڈ ملان سمیت پشاورزلمی کے چار کھلاڑی فائنل کے لیے لاہور آئے جبکہ لاہور آنے والے دیگر غیرملکی کھلاڑی پی ایس ایل کے راؤنڈ اور پلے آف مرحلے میں پی ایس ایل کا حصہ نہیں تھے۔
مزید پڑھیں:پی ایس ایل فائنل: غیرملکی کھلاڑیوں کی لاہور آمد
پی ایس ایل کی سیکیورٹی کے سربراہ سابق کرنل محمد اعظم خان کا کہنا تھا کہ کرکٹ مداح پیٹرنز انکلوژر سے داخل ہوا تھا جو ڈریسنگ روم کے برابر میں ہے اور مداح کھلاڑیوں سے آٹوگراف لینے کے لیے بھاگ دوڑ کررہے تھے اور اسی دوران ڈریسنگ روم کے احاطے میں داخل ہورہے تھے۔
اعظم کا کہنا تھا کہ پتہ چلتے ہی ڈریسنگ روم سے اس مداح کو فوری طور پر باہر نکال دیا گیا۔
ڈیوڈ ملان نے کہا کہ 'ہم جیسے ہی میدان میں پہنچے تو ہمارے کرکٹ بیگز چیک کیے گئے جس کے بعد ہمیں ڈریسنگ روم میں بیٹھنے کی جگہ ملی اور میں اپنے کپڑے بیگ میں رکھ کر ادھر ادھر چلنے لگا تو وہاں ایک بچہ سیلفی کا کہہ رہا تھا'۔
یہ بھی پڑھیں: پشاورزلمی کی ٹیم پی ایس ایل چمپیئن بن گئی
انگلش بلے باز نے کہا کہ 'میں نے کمرے میں موجود سیکیورٹی گارڈ کی طرف دیکھا اور ان سے کہا معاف کیجیے گا یہ لڑکا کون ہے؟ اوریک دم وہ سب حرکت میں آگئے اور اس کو دروازے سے باہر دھکیل دیا'۔
واضح رہے کہ پنجاب حکومت نے قذافی اسٹیڈیم لاہور میں پی ایس ایل کے فائنل کے لیے پولیس، پنجاب رینجرز اور پاک فوج کے اہلکاروں سمیت 10 ہزار سیکیورٹی اہلکار تعینات کیے تھے۔
دوسری جانب بین الاقوامی کھلاڑیوں کو کرکٹرز کی عالمی ایسوسی ایشن (فیکا) نے پاکستان جانے کے لیے احتیاط برتنے کا کہا تھا۔
ڈیوڈ ملان نے ہوٹل سے بس کی طرف جاتے ہوئے مداحوں کے قریب آنے کو بھی کسی حد تک تشویش کا باعث قرار دیا۔
مزید پڑھیں:آئی سی سی پی ایس ایل فائنل کی سیکیورٹی کا جائزہ لے گا
ان کا کہنا تھا کہ 'یہ ایسی چیز ہے جس کو مستقبل میں لازمی طورپر بہتر کیا جاسکتا ہے، میرے خیال میں ہوسکتا ہے کہ وہ مجموعی سیکیورٹی کے حوالے سے پریشان ہوں اور ہوسکتا ہے کہ انھوں نے چھوٹی چیزوں پر زیادہ توجہ نہ دی ہو'۔
ملان نے مزید کہا کہ 'میرا خیال ہے کہ مستقبل میں اگر آپ چاہتے ہیں کہ بین الاقوامی ٹیمیں وہاں کا دورہ کریں گی تو ان تمام چھوٹی چیزوں کو بھی معاملات میں شامل کرنا پڑے گا'۔
پی ایس ایل کے فائنل میں ڈیوڈ ملان کی ٹیم پشاورزلمی نے کوئٹہ گلیڈی ایٹرز کو یک طرفہ مقابلے کے بعد شکست دے کر چمپیئن بننے کا اعزاز حاصل کیا تھا۔
لائیو ٹی وی