متحدہ مجلسِ عمل ٹکٹوں کا معاملہ حل کرنے کیلئے پُر امید
امیرِ جماعتِ اسلامی سینیٹر سراج الحق کا کہنا ہے کہ آئندہ انتخابات کے لیے ٹکٹ کے معاملے پر کوئی ابہام نہیں ہے اور یہ معاملہ عید کے بعد حل کر لیا جائے گا۔
ڈان سے بات چیت کرتے ہوئے سراج الحق کا کہنا تھا کہ متحدہ مجلس عمل (ایم ایم اے) میں شامل جماعتوں میں اس حوالے سے کوئی اختلاف نہیں ہے اور نہ ہی اس کا اثر انتخابات کے نتائج پر پڑے گا۔
انہوں نے مزید کہا کہ چونکہ سیاسی جماعت کے امیدوار ابھی اپنی سیاسی جماعتوں کے پلیٹ فارم سے انتخابی مہم کا آغاز کر رہے ہیں، اس لیے یہ تاثر ابھر رہا ہے کہ ایم ایم اے کا اتحاد ابھی وجود میں نہیں آیا، یا پھر اتحاد میں شامل جماعتیں اپنے علیحدہ علیحدہ مفاد کے لیے کام کر رہی ہیں۔
انہوں نے اس بات کا بھی اعتراف کیا کہ ٹکٹ کے معاملے میں سب کچھ بہتر نہیں ہے، حتیٰ کہ ایم ایم اے اتحاد میں شامل سیاسی جماعتیں بھی اندرونی طور پر ٹکٹ کے معاملے میں کسی نتیجے پر نہیں پہنچ سکیں۔
امیرِ جماعت اسلامی نے انکشاف کیا کہ خیبرپختونخوا اور بلوچستان میں ٹکٹ کے حوالے سے مسائل ہیں جنہیں ضلعی، صوبائی یا پھر مرکزی پارلیمانی بورڈ کی سطح پر حل نہیں کیا جاسکتا، لہٰذا انہیں عید الفطر کے بعد ایم ایم اے کی سپریم کونسل کے سامنے اٹھایا جائے گا۔
متعلقہ خبر:
لائیو ٹی وی