کوئٹہ میں شدید برف باری سے نظام زندگی مفلوج
بلوچستان میں شدید برف باری سے پہاڑوں نے سفید چادر اوڑھ لی اور سردی کی نئی لہر کا آغاز ہوگیا۔
وادی زیارت میں برف باری کا 15 برس پرانا ریکارڈ ٹو ٹ گیا اور اب تک 3 فٹ برف پڑ چکی ہے جبکہ کوئٹہ سمیت دیگر علاقوں میں معمولات زندگی بھی سردی کے باعث متاثر ہورہی ہے اور لوگ گھروں تک محصور ہو کر رہ گئے ہیں۔
دوسری جانب محکمہ موسمیات نے مذکورہ علاقوں میں مزید برف باری کی پیش گوئی کی ہے ساتھ ہی شدید برف باری کے باعث بجلی بند ہونے سے سیاحوں اور مقامی افراد کو شدید مشکلات کا سامنا ہے۔
بلوچستان میں بارشوں اور برف باری سے پیدا ہونے والی صورت حال پر وزیراعلیٰ جام کمال نے وزیراعظم عمران خان سے فون پر رابطہ کیا اور صورتحال سے متعلق آگاہ بھی کیا۔
جام کمال نے سرکاری عمارتوں کوعارضی شیلٹرہاؤسز میں تبدیل کرنے کی ہدایت بھی جاری کردی۔
