پاکستان ون ڈے کرکٹ ٹیم کےکپتان محمد رضوان نے پے در پے شکستوں کاسارا ملبہ سلیکشن کمیٹی پر ڈالتے ہوئے کہا ہے کہ سب کو معلوم ہے سلیکشن کمیٹی چیزیں کنٹرول کر رہی ہے، کوچ،کپتان اور کمیٹی اپنی اپنی ذمہ داریوں کے لیے جواب دہ ہیں جبکہ سابق کپتان بابر اعظم نے سب کے سامنے محتاط رویہ اپنایا۔

لاہور میں پی ایس ایل کپتانوں کی پریس کانفرنس کے دوران گفتگو کرتے ہوئے محمد رضوان نے شکست کی ذمہ داری سے متعلق سوال پر کہا کہ سارے اختیارات سلیکشن کمیٹی کے پاس ہیں، سلیکشن کمیٹی سب کے سامنے آکر اس بات کا اعتراف کرتی ہے۔

انہوں نے کہا کہ سب کو پتا ہے کہ سلیکشن کمیٹی چیزیں کنٹرول کر رہی ہے، کوچز، کپتان اور سلیکشن کمیٹی اپنی اپنی ذمہ داریوں کے لیے چیئرمین پی سی بی کو جواب دہ ہیں۔

سب کے سامنے ڈھنڈورا نہیں پیٹتا، بابر اعظم

قومی ٹیم کے سابق کپتان اور پی ایس ایل فرنچائز پشاور زلمی کے کپتان بابر اعظم نے سب کے سامنے ٹیم مینجمنٹ کی عزت اچھالنے سے گریز کرتے ہوئے کہا کہ سب کے سامنے ڈھنڈورا نہیں پیٹتا، جسے بھی مشورہ دینا ہو بند کمرے میں دیتا ہوں۔

بابر اعظم نے کہا کہ پی ایس ایل میں ہر فرنچائز بہترین اسکواڈ بنانے کی کوشش کرتی ہے، پشاور زلمی نے بیٹنگ اور باؤلنگ کی خامیوں پر قابو پانے کی کوشش کی ہے۔

شاہین شاہ آفریدی نے خراب پرفارمنس کی ذمہ داری قبول کرلی، انہوں نے کہا کہ جس طرح بلے بازوں کی طرح بالرز کی بھی ذمہ داری ہوتی ہے کہ وہ 200 رنز نہ کھائیں اور اگر ٹیم 200 رنز بنائے تو ہماری ذمہ داری ہے کہ وہ آسانی سے حاصل نہ ہوں۔

انہوں نے کہا کہ ہم ایک ہی ٹیم ہیں، ایک ہی خاندان ہیں، اگر کچھ وقت سے کرکٹ زوال کا شکار ہے اور ہماری ہی وجہ سے ہے تو ہم ہی اس کرکٹ کو اوپر لے کر آئیں گے۔

شاہین شاہ آفریدی نے کہا کہ پاکستان کے عوام کرکٹ سے محبت کرتے ہیں، پی ایس ایل کی ٹرافی جو بھی جیتے وہ پاکستان کی جیت ہوگی، انہوں نے کہا کہ پی ایس ایل ایک الگ ٹورنامنٹ ہے، جس کا پریشر بھی الگ ہوتا ہے۔

کراچی کنگز کے نائب کپتان فاسٹ باؤلر حسن علی نے کہا کہ ہم میدان میں صورتحال کے حساب سے کھیلتے ہیں، کمنٹری باکس میں بیٹھ کر باتیں کرنا آسان ہے، میدان میں عمل کرنا مشکل ہوتا ہے، انہوں نے کہا کہ اس بار کراچی کے لیے اچھا کمبی نیشن بنانے کی کوشش کی ہے۔

اسلام آباد یونائیٹڈ کے کپتان شاداب خان نے کہا کہ امید ہے شائقین کو پی ایس ایل میں اچھی کرکٹ دیکھنے کو ملے گی۔

پی ایس ایل کا آغاز کل ہوگا

یاد رہے کہ پاکستان سپر لیگ (پی ایس ایل) کا 10واں سیزن کل سے شروع ہونے جارہا ہے، افتتاحی میچ راولپنڈی کرکٹ اسٹیڈیم میں رات ساڑھے 8 بجے اسلام آباد یونائیٹڈ اور لاہور قلندرز کے درمیان کھیلا جائے گا۔

میچ سے پہلے رنگا رنگ افتتاحی تقریب بھی منعقد ہوگی جس میں عابدہ پروین، علی ظفر، ابرار الحق، نتاشہ بیگ اور ینگ اسٹنرز پرفارم کریں گے۔

ٹورنامنٹ میں مجموعی طور پر 6 ٹمیوں کے درمیان کراچی، لاہور، ملتان اور راولپنڈی میں 34 میچز ہوں گے۔

کوالیفائر میچ 13 مئی کو راولپنڈی میں کھیلا جائے گا جبکہ پہلا ایلی مینیٹر 14 مئی اور دوسرا 16 مئی کو لاہور میں ہوگا جبکہ پی ایس ایل سیزن 10 کا فائنل 18 مئی کو لاہور میں کھیلا جائے گا۔