ساجد سدپارہ نے آکسیجن اور پورٹر کے بغیردنیا کی ساتویں بلند چوٹی سر کرلی
معروف پاکستانی کوہ پیما ساجد علی سدپارہ نے ہفتے کو 8167 میٹر بلندی کی حامل دنیا کی ساتویں بلند ترین چوٹی دھولگیری آکسیجن اور پورٹر کی مدد کے بغیر سر کر لی۔
4 مئی کو 4 پاکستانی کوہ پیماؤں نے نیپال میں واقع دھولگیری کی چوٹی کو سر کرنے کے لیے اپنی مہم کا آغاز کیا تھا، ساجد سدپارہ 6 اپریل کو اس چوٹی کے بیس کیمپ پر پہنچ گئے تھے، جس کے بعد انہوں نے اپنی چڑھائی کا آغاز کیا، کیمپ 3 تک پہنچے اور پھر بیس کیمپ کی طرف واپس آگئے۔
الپائن کلب آف پاکستان نے ساجد سدپارہ کے اس کارنامے کی تصدیق کی ہے، دھولگیری 8 ہزار میٹر سے بلند 9 ویں چوٹی ہے جسے ساجد سدپارہ نے مصنوعی آکسیجن اور پورٹر کے بغیر سر کیا ہے۔
سیون سمٹ ٹریکس نے ایک بیان میں کہا کہ ٹیم نے ہفتے کو صبح 9 بجکر 35 منٹ پر چوٹی سر کی، جو کہ بہار 2025 کے موسم میں دھولگیری کی پہلی تصدیق شدہ کامیاب مہم ہے۔
ٹیم نے پہلے ہی 8050 میٹر تک رسیاں لگادی تھیں اور سازگار موسمی صورتحال میں اپنی مہم مکمکل کرنے کی آخری کوشش کا آغاز کیا۔
اس ٹیم نے جمعے کو شام 6بجکر15 منٹ پرکیمپ 4 سے اپنی مہم کا آغاز کیا، اوپر پہنچنے کے لئے کامیابی کے ساتھ قریب 350 میٹر کی رسی لگا کر راستے کے آخری حصے کو محفوظ بناتے ہوئے بے پناہ کوششیں کیں۔
محض 29 سال کی عمر میں ساجد سدپارہ نے دیوقامت چوٹیاں سر کرکےقابل ذکر برداشت، طاقت اور لگن کا مظاہرہ کیا ہے۔
ساجد سدپارہ لیجنڈری محمد علی سدپارہ کے قابل فخر بیٹے ہیں، جو 2021 کے موسم سرما میں کے ٹو سر کرنے کے دوران افسوسناک طور پر اپنی جان سے ہاتھ دھو بیٹھےتھے۔
اپنے والد کی وراثت کو عزت کے ساتھ سنبھالتے ہوئے ساجد سدپارہ پاکستانی کوہ پیمائی کی طاقت اور عالمی کمال کی ایک طاقتور علامت بن کر ابھرے ہیں۔
پاکستان کے آلپائن کلب کے سیکریٹری قرار حیدری نے ساجد سدپارہ کو مبارک باد دیتے ہوئے ان کے کارنامے کو تاریخی سنگ میل قرار دیا ہے جو دنیا کے سامنے پاکستانی کوہ پیماؤں کی طاقت اور ہمت کی عکاسی کرتا ہے۔
مہم جوئی سے قبل ڈان ڈاٹ کام سے گفتگوکرتے ہوئے ساجد سدپارہ نے کہا تھا کہ وہ بغیر اضافی آکسیجن اور پورٹر کی مدد کے چوٹی سر کرنے کی کوشش کریں گے، سدپارہ نے پہلے ہی 8 ہزار میٹر سے بلند کی دنیا کی آٹھ چوٹیاں سرکر رکھی تھیں، جن میں ایورسٹ، کے 2، نانگاپربت، براڈ پیک، گاشر برم-I، اور گاشر برم-II شامل ہیں۔
انہوں نے نے کئی چوٹیوں بشمول کے 2 میں امدادی کارروائیوں میں بھی حصہ لیا ہے اور وہ 8 ہزار میٹر سے بلندر تمام 14 چوٹیوں کو سر کرنے کا ارادہ رکھتے ہیں۔
لائیو ٹی وی