کراچی : موچکو میں ’ہیٹ اسٹروک‘ سے 15 سالہ لڑکا جاں بحق
کراچی کے علاقے موچکو میں ہیٹ اسٹروک سے ایک لڑکا جاں بحق ہوگیا، جس کی لاش سول ہسپتال کراچی لائی گئی۔
پولیس سرجن ڈاکٹر سمیہ سید نے بتایا کہ تقریباً 15 سال کی عمر کے ایک نامعلوم لڑکے کو موچکو سے مردہ حالت میں سول ہسپتال کراچی لایا گیا۔
انہوں نے مزید بتایا کہ لاش کے حوالے سے ضروری قانونی کارروائی مکمل کی گئی، بعدازاں اس کا پوسٹ مارٹم کیا گیا جس کے مطابق بظاہر یہ ’ہیٹ اسٹروک‘ کا کیس تھا۔
بتایا گیا کہ 15 سالہ لڑکا بے گھر تھا جس کی لاش مراد کلمتی گوٹھ کے جنگلاتی علاقے سے ملی تھی۔
واضح رہے کہ کراچی شدید گرمی کی لپیٹ میں ہے اور دن کے وقت درجہ حرارت 40 ڈگری سے تجاوز کررہا ہے، سمندری ہوائی مکمل معطل ہونے پر محکمہ موسمیات نے ہیٹ اسٹروک کا خدشہ ظاہر کرتے ہوئے شہریوں کو خصوصی احتیاطی تدابیر اختیار کرنے کی ہدایت کی ہے۔
لائیو ٹی وی