ایئر چیف مارشل ظہیر احمد بابر سدھو کا دورہ امریکا، اعلیٰ عسکری اور سیاسی قیادت سے ملاقاتیں
چیف آف دی ایئر اسٹاف ایئر چیف مارشل ظہیر احمد بابر سدھو نے امریکا کا سرکاری دورہ کیا اور امریکی عسکری اور سیاسی قیادت سے ملاقاتیں کیں۔
پاک فوج کے شعبہ تعلقات عامہ (آئی ایس پی آر) کے مطابق چیف آف دی ایئر اسٹاف ایئر چیف مارشل ظہیر احمد بابر سدھو نے امریکا کا سرکاری دورہ کیا، یہ دس سال سے زائد عرصے میں کسی بھی حاضر سروس پاک فضائیہ کے سربراہ کا پہلا دورہ تھا۔
آئی ایس پی آر کے مطابق یہ اعلیٰ سطح کا دورہ پاک-امریکا دفاعی تعاون میں ایک اسٹریٹیجک سنگ میل ثابت ہوا اور اہم علاقائی اور عالمی سلامتی کے امور کو حل کرنے کے علاوہ ادارہ جاتی تعلقات کو گہرا کرنے میں بھی اہم کردار ادا کیا۔
دورے کے دوران چیف آف دی ایئر اسٹاف نے امریکی عسکری اور سیاسی قیادت کے ساتھ اعلیٰ سطح کی ملاقاتیں کیں، پینٹاگون میں، انہوں نے سیکریٹری آف دی ایئر فورس (انٹرنیشنل افیئرز) مس کیلی ایل سیبولٹ، اور چیف آف اسٹاف آف دی یونائیٹڈ اسٹیٹس ایئر فورس جنرل ڈیوڈ ڈبلیو آلوین سے ملاقات کی۔
ان ملاقاتوں کے دوران بات چیت دوطرفہ فوجی تعاون کو آگے بڑھانے، باہمی عملیت (interoperability) کو بڑھانے اور مشترکہ تربیت و ٹیکنالوجی کے تبادلے کے راستوں کی تلاش پر مرکوز رہی۔
آئی ایس پی آر کا کہنا تھا کہ چیف آف دی ایئر اسٹاف نے پاکستان اور امریکا کے درمیان، خاص طور پر دفاع اور سلامتی کے تعاون کے شعبوں میں تاریخی اور کثیر جہتی تعلقات پر روشنی ڈالی، انہوں نے دونوں ممالک کی فضائی افواج کے درمیان فوج سے فوج کی سطح پر تعاون اور تربیت کے شعبوں میں موجودہ تعلقات کو مزید بڑھانے کے اپنے عزم کا اعادہ کیا۔
دونوں فریقین نے مستقبل میں اعلیٰ سطح کی فوجی مصروفیات کو جاری رکھنے پر بھی اتفاق کیا، دونوں ممالک کے درمیان مشترکہ تربیت، آپریشنل مشقوں اور فوجی تبادلے کے پروگراموں کے شعبوں میں جاری تعاون کی رفتار کو برقرار رکھنے کے لیے اہم سمجھے جاتے ہیں۔
امریکی محکمہ خارجہ میں، ایئر چیف نے بیورو آف پولیٹیکلملٹری افیئرز کے براؤن ایل اسٹینلی اور بیورو آف ساؤتھ اینڈ سینٹرل ایشین افیئرز کے ایرک میئر سے ملاقات کی، ان ملاقاتوں نے علاقائی استحکام کو فروغ دینے میں پاکستان کے تعمیری کردار، انسداد دہشت گردی کی کوششوں کے لیے اس کی پختہ وابستگی اور جنوبی و وسطی ایشیا کی بدلتی ہوئی جیو پولیٹیکل حرکیات پر اس کے واضح نقطہ نظر کو اجاگر کرنے کے لیے ایک پلیٹ فارم کا کام کیا۔
کیپیٹل ہل میں چیف آف دی ایئر اسٹاف نے امریکی کانگریس کے ممتاز ارکان بشمول مائیک ٹرنر، رچ میک کارمک اور بل ہیزنگا کے ساتھ اہم بات چیت کی۔
ان ملاقاتوں نے دوطرفہ تعلقات کو مضبوط بنانے میں بھرپور مصروفیت کی اہمیت کو تقویت بخشی اور اسٹریٹیجک چیلنجز، علاقائی سلامتی کے فریم ورک اور دفاعی تعاون پر ابھرتی ہوئی ٹیکنالوجیز کے اثرات پر پاکستان کے خیالات کو شریک کرنے کا ایک قیمتی موقع فراہم کیا۔
ایئر چیف نے پاکستان کے ایک امن پسند قوم کی حیثیت پر زور دیتے ہوئے، عالمی دہشت گردی کے خلاف جنگ میں ملک کی دیرینہ قربانیوں اور قابل ذکر آپریشنل کامیابیوں کا تذکرہ کیا، جبکہ تیزی سے بدلتے ہوئے علاقائی جیو پولیٹیکل منظرنامے کے جواب میں پاکستان کے بدلتے ہوئے سیکیورٹی منظرنامے کا بھی خاکہ پیش کیا۔
اس تاریخی دورے نے نہ صرف پاک فضائیہ کے علاقائی اور عالمی امن کو فروغ دینے کے عزم کا اعادہ کیا، بلکہ پاک فضائیہ اور یونائیٹڈ اسٹیٹس ایئر فورس کے درمیان تجدید شدہ ادارہ جاتی تعاون، اسٹریٹیجک ڈائیلاگ اور بہتر باہمی عملیت کی بنیاد بھی رکھی۔
لائیو ٹی وی