98 ویں اکیڈمی ایوارڈز کے لیے پاکستانی فلم سازوں سے درخواستیں طلب
پاکستانی اکیڈمی سلیکشن کمیٹی نے 98 ویں اکیڈمی ایوارڈز (آسکرز) کے لیے بین الاقوامی فیچر فلم ایوارڈ کیٹیگری میں فلم سازوں سے 15 اگست تک فلمیں جمع کرانے کی درخواست کی ہے۔
ڈان امیجز کے مطابق بین الاقوامی فیچر فلم ایوارڈ کیٹیگری میں ان فلموں کو شامل کیا جاتا ہے جو امریکا سے باہر تیار کی گئی ہوں اور جن کے مکالمات کا کم از کم 50 فیصد حصہ غیر انگریزی زبان میں ہو۔
اس زمرے میں وہ اینیمیٹڈ اور دستاویزی فلمیں بھی شامل کی جا سکتی ہیں جو اکیڈمی آف موشن پکچر آرٹس اینڈ سائنسز (اے ایم پی اے ایس) کے مقررہ معیار پر پوری اُترتی ہوں۔
پریس ریلیز کے مطابق، سلیکشن کمیٹی کے ارکان کو نجی نامزدگیوں اور حوالہ جات کی بنیاد پر منتخب کیا جاتا ہے، نامزد کنندگان میں فلمی صنعت کے پیشہ ور افراد، فلم ساز، فنکار اور تکنیکی ماہرین شامل ہوتے ہیں۔
کمیٹی کا چیئرپرسن سلیکشن کمیٹی کے ممکنہ ارکان کی فہرست انٹرنیشنل فیچر فلم ایگزیکٹو کمیٹی کو منظوری کے لیے پیش کرتا ہے۔
کمیٹی اس امر کو یقینی بناتی ہے کہ ہر رکن انفرادی طور پر تمام فلمیں دیکھے اور ووٹ دے، جس کا طریقہ کار اکیڈمی کے نظام کے مطابق ہوتا ہے۔
بعد ازاں، چیئرپرسن اور اُن کی ٹیم ووٹوں کی گنتی کرتے ہیں اور اکیڈمی کے ساتھ مل کر اس عمل میں تعاون فراہم کرتے ہیں تاکہ فلم ساز اپنی فلمیں کامیابی سے جمع کرا سکیں، اس کے بعد، کمیٹی ایک فلم کو پاکستان کی سرکاری آسکر نامزدگی کے طور پر منتخب کرتی ہے۔
گزشتہ برسوں میں پاکستان کی جانب سے جن فلموں کو نامزد کیا گیا، ان میں دی گلاس ورکر، جوائے لینڈ اور ان فلیمز شامل ہیں۔
اہلیت کے لیے ضروری ہے کہ فلم 1 اکتوبر 2024 سے 30 ستمبر 2025 کے درمیان مسلسل کم از کم سات دن تک کسی کمرشل سنیما میں عوامی نمائش کے لیے پیش کی گئی ہو، چاہے یہ نمائش ملک کے اندر ہو یا بیرون ملک (البتہ امریکا اور اس کے زیر انتظام علاقوں میں نہیں)۔
یہ بھی لازم ہے کہ فلم کی ریلیز کے دوران تھیٹریکل تقسیم کے مروجہ طریقے کے مطابق اس کی مناسب تشہیر اور نمائش کی جائے۔
وہ فلمیں جو اس سینما ریلیز سے قبل کسی بھی غیر تھیٹریکل پلیٹ فارم جیسے کہ ٹی وی، کیبل، اسٹریمنگ، آن لائن یا ایئر لائن انٹرٹینمنٹ پر ریلیز ہو چکی ہوں نااہل قرار دی جائیں گی۔
فلم سازوں کو تاکید کی گئی ہے کہ وہ اہلیت کے تمام اصولوں کا بغور جائزہ لیں اور تمام تکنیکی اور ریلیز سے متعلق تقاضے مکمل کریں۔
واضح رہے کہ فلم میں مکالمے زیادہ تر غیر انگریزی زبان میں ہونے چاہییں اور تمام فلموں میں درست اور واضح انگریزی سب ٹائٹلز ہونا ضروری ہے۔
تفصیلی قواعد و ضوابط جاننے کے لیے اکیڈمی ایوارڈز کی ویب سائٹ وزٹ کریں۔
فلم ساز اندراج فارم، جمع کرانے کے رہنما اصول حاصل کرنے یا سوالات بھیجنے کے لیے درج ذیل ای میل پر رابطہ کر سکتے ہیں [email protected]۔
لائیو ٹی وی