کراچی: شادی کی تقریب میں ہوائی فائرنگ سے بچی جاں بحق، دلہا اور والد گرفتار
کراچی میں شادی کی تقریب کے دوران ہوائی فائرنگ سے 12 سالہ بچی کے جاں بحق ہونے کے بعد پولیس نے دلہا اور اس کے والد کو گرفتار کرلیا۔
سائٹ اے پولیس اسٹیشن کے ایس ایچ او عمران آفریدی نے ڈان کو بتایا کہ زینت گلزادہ بدھ کی رات شادی کی تقریب کے دوران خوشی میں کی گئی ہوائی فائرنگ کے نتیجے میں گولی لگنے سے زخمی ہوگئی تھی۔
انہوں نے بتایا کہ ایک گولی ٹین کی چادر کو پھاڑتے ہوئے اس بچی کے سینے میں گھس گئی، جو اپنے گھر کے صحن میں سو رہی تھی، بچی کو عباسی شہید ہسپتال لے جایا جا رہا تھا کہ وہ راستے میں دم توڑ گئی۔
پولیس نے مقتولہ کے والد گلزادہ کی مدعیت میں حامد خان، اس کے بیٹے اور دُلہا حبیب خان اور دیگر کے خلاف پاکستان پینل کوڈ کی دفعہ 322 اور 34 کے تحت مقدمہ درج کر لیا ہے۔
سینیئر سپرنٹنڈنٹ آف پولیس (ایس ایس پی) کیماڑی فیضان علی نے بتایا کہ پولیس نے دونوں نامزد ملزمان کو گرفتار کر لیا ہے۔
لائیو ٹی وی