پیپلزپارٹی کی بذریعہ سڑک زائرین کے ایران و عراق جانے پر پابندی کے حکومتی فیصلے پر کڑی تنقید
پاکستان پیپلز پارٹی (پی پی پی) نے وفاقی حکومت کی جانب سے زائرین پر سڑک کے ذریعے ایران اور عراق جانے پر پابندی لگانے کے فیصلے کو شدید تنقید کا نشانہ بنایا ہے۔
زائرین عراق اس لیے جاتے ہیں تاکہ نواسہ رسولﷺ، امام حسینؓ کی شہادت کے چالیسویں (اربعین) کے موقع پر منعقدہ تعزیتی تقریب میں شرکت کر سکیں، اربعین عربی میں ’ چالیس’ کو کہتے ہیں، اور یہ یوم عاشور کے بعد چالیسویں دن منایا جاتا ہے۔
گزشتہ روز وفاقی وزیر داخلہ محسن نقوی نے اعلان کیا تھا کہ قومی اور عوامی سلامتی کے پیش نظر زائرین کو سڑک کے ذریعے ایران اور عراق جانے کی اجازت نہیں دی جائے گی۔
پیپلز پارٹی کے رہنما حسن مرتضیٰ نے آج ایک بیان جاری کرتے ہوئے کہا کہ ’ وفاقی اور صوبائی حکومتوں کو سیکیورٹی اداروں کی مدد سے زائرین کے تحفظ کو یقینی بنانا چاہیے۔’
انہوں نے کہا کہ مسافروں کی حفاظت ریاست کی ذمہ داری ہے۔
حسن مرتضیٰ نے اس پابندی کو تنقید کا نشانہ بناتے ہوئے کہا کہ اس کا اثر براہ راست عام آدمی پر پڑے گا، انہوں نے سوال کیا کہ’ جو عام آدمی ریاست کو ٹیکس دیتا ہے، وہ سڑک کے ذریعے سفر کیوں نہیں کر سکتا؟’
رہنما پیپلزپارٹی نے کہا کہ زیارات کو غریب عوام کی پہنچ سے دور کیا جا رہا ہے۔
انہوں نے مزید کہا کہ ’ اربعین کے زائرین پیسہ پیسہ جوڑ کر اپنے اہل خانہ کے ساتھ زیارت کے سفر پر جاتے ہیں، وہ سڑک کے ذریعے سفر کو ترجیح دیتے ہیں کیونکہ یہ کم خرچ ہوتا ہے۔’
عراق کے شہر کربلا میں، جہاں امام حسینؓ اور ان کے بھائی حضرت عباس٘ؓ مدفون ہیں، دو عظیم مزارات ایک دوسرے کے سامنے قائم ہیں، اربعین کے موقع پر کربلا اہل تشیع کے لیے روحانی مرکز بن جاتا ہے، گزشتہ سال 2 کروڑ 10 لاکھ سے زائد زائرین نے زیارت میں شرکت کی تھی۔
پاکستان میں یکم جنوری 2026 سے زائرین کے لیے ایک نیا ٹریول مینجمنٹ سسٹم متعارف کرایا جا رہا ہے، جس کے تحت زائرین صرف رجسٹرڈ آرگنائزرز کے ذریعے سفر کر سکیں گے۔
اس نئے نظام کے تحت روایتی ’ سالار سسٹم’ ختم کر کے ’ زائرین گروپ آرگنائزر ماڈل’ متعارف کرایا جائے گا، اس کے علاوہ، ایران کے لیے ہفتہ وار پروازوں کی تعداد 6 سے بڑھا کر 15 کی جا رہی ہے، اور عراق جانے والے زائرین کے لیے مزید 107 خصوصی پروازوں کا انتظام بھی کیا جائے گا۔
وزیر اعظم اور وزیر داخلہ کی حالیہ ملاقات کے بعد، پاکستان انٹرنیشنل ایئرلائنز (پی آئی اے) نے اعلان کیا کہ 8 سے 11 اگست کے درمیان عراق جانے والے زائرین کے لیے خصوصی پروازیں شروع کی جائیں گی۔
مجلس وحدت المسلمین (ایم ڈبلیو ایم) نے بھی گذشتہ روز وفاقی حکومت کے اس فیصلے پر سخت ردِعمل دیتے ہوئے بذریعہ سڑک زائرین کے زیارات کے لیے جانے پر پابندی کو ناقابل قبول، بلاجواز اور آئین کے خلاف قرار دیا تھا۔
لائیو ٹی وی