کل پولیس انتظار کرتی رہی لیکن کوئی احتجاج کیلئے نہیں نکلا، مریم نواز
وزیر اعلیٰ پنجاب مریم نواز نے پی ٹی آئی پر تنقید کرتے ہوئے کہا کہ پولیس انتظار کرتی رہی لیکن کل کوئی احتجاج کے لیے نہیں نکلا، فتنوں اور گالم گلوچ کی سیاست ہماری کارکردگی کے سامنے دفن ہوگئی۔
لاہور میں اپنی چھت اپنا گھر منصوبے کی تقریب سے خطاب کے دوران مریم نواز نے 19 اضلاع سے اس منصوبے کو شروع کرنے کا اعلان کرتے ہوئے کہا کہ گھروں کی تعمیر کرنے والے مزدور آج اپنے گھر کے مالک بن گئے ہیں۔
انہوں نے کہا کہ رواں سال کےآخرتک ایک لاکھ اپنی چھتیں فراہم کی جائیں گی، اگست کے آخرتک قرضوں کو 75 ہزار تک پہنچایا جائے گا، قرض دہندہ اپنی آمدنی سے باآسانی قرض ادا کرسکے گا۔
مزید کہا کہ قرض دہندہ کو 9 سال کی مدت میں قرض واپس کرنا ہوگا، 7 ماہ میں تقریباً 64 ہزار بلاسود قرضے دیے جاچکے ہیں۔
تقریب کے دوران وزیراعلیٰ پنجاب نے پاکستان تحریک انصاف پر تنقید کرتے ہوئے کہا کہ فتنوں اور گالم گلوچ کی سیاست ہماری کارکردگی کے سامنے دفن ہوگئی، یہ جلاؤ گھیراؤ والے کیا جانے کہ عوام کی خدمت کا کیا مزا ہے۔
ان کا کہنا تھا کہ آئی جی صاحب انتظار کرتے رہے لیکن کل کوئی احتجاج کے لیے نکلا ہی نہیں، اب پاکستان و پنجاب کا مقدر سازشوں سے نہیں خدمت سے لکھا جائےگا۔
مریم نواز نے کہا کہ تقریریں کرنا بہت آسان ہے لیکن اب لوگوں نے آپ کی اصلیت دیکھ لی، پاکستان اب سفارتی محاذ پر ابھر رہا ہے، تمام ادارے پاکستان کی معیشت میں بہتری کی نوید سنا رہے ہیں۔
ان کا مزید کہنا تھا کہ آج پاکستان کی قیادت مخلص اور اہل قیادت کے ہاتھوں میں ہے، یہ وہ ترقی کی تبدیلی ہے جو لوگوں کو نظر آرہی ہے اور یہ وہ پاکستان ہے جس کو کوئی پوچھتا نہیں تھا۔
لائیو ٹی وی