ایکسٹینشن نہیں تسلسل جاری رہے گا، کسی کے باپ میں دم ہے تو روک کر دکھائے، فیصل واڈا
سینیٹر فیصل واڈا نے تحریک انصاف کے رکن قومی اسمبلی اور سابق اسپیکر اسد قیصر کے حالیہ بیان پر ردعمل دیتے ہوئے کہا ہے کہ ایکسٹیشن نہیں تسلسل جاری رہے گا، کسی کے باپ میں دم ہے تو روک کر دکھائے۔
تحریک انصاف حکومت کے سابق وفاقی وزیر اور موجودہ سینیٹر فیصل واڈا نے اسد قیصر کی ویڈیو اپنی ’ایکس‘ پوسٹ میں شیئر کرتے ہوئے لکھا کہ ’ایکسٹینشن نہیں (تسلسل جاری رہے گا‘۔
انہوں نے مزید لکھا کہ ’اللہ کرم رکھے، کسی کے باپ میں دم ہے تو اس تسلسل کو روک کے دکھائے، پاکستان کی کامیابیوں کا یہ سفر جاری رہے گا‘۔
یاد رہے کہ تحریک انصاف کے رہنما اسد قیصر نے گزشتہ دنوں محمود اچکزئی اور سابق گورنر سندھ محمد زبیر کے ساتھ پریس کانفرنس کرتے ہوئے اعتراف کیا تھا کہ سابق آرمی چیف جنرل (ر) قمر جاوید باجوہ کو ایکسٹینشن دینا تحریک انصاف کی سب سے بڑی غلطی تھی، جس پر پی ٹی آئی قوم سے معذرت خواہ ہے۔
ڈان اخبار میں شائع رپورٹ کے مطابق اسد قیصر کا کہنا تھا کہ ان کی جماعت آئندہ کبھی ایسی کسی ایکسٹینشن کی حمایت نہیں کرے گی۔
اسد قیصر نے ملک کے طرزِ حکمرانی کو غیر قانونی، غیر آئینی اور غیر جمہوری قرار دیتے ہوئے کہا کہ ملک عملاً مارشل لا کے تحت چل رہا ہے اور فیصلے ذاتی پسند و ناپسند کی بنیاد پر ہو رہے ہیں، ملک کو اس موجودہ ہائبرڈ نظام کے تحت نہیں چلایا جاسکتا۔
ان کا کہنا تھا کہ ہم نے فیصلہ کیا ہے کہ ہم پارلیمان، عدالتوں اور عوام سمیت ہر فورم کو استعمال کریں گے تاکہ ناانصافی اور جبر کے خلاف اپنی جدوجہد کو آگے بڑھا سکیں جب کہ پی ٹی آئی رواں ماہ غیر ملکی سفارت کاروں سے ملاقاتوں کے ساتھ ساتھ ایک سیمینار بھی منعقد کرے گی۔
اس موقع پر محمود اچکزئی نے کہا تھا کہ مدتِ ملازمت میں توسیع کے دروازے ہمیشہ کے لیے بند کر دینے چاہئیں۔
لائیو ٹی وی