کراچی: ملیر جیل سے جاوید نامی قیدی فرار
کراچی کی ملیر جیل سے جاوید نامی قیدی فرار ہو گیا ہے، ڈی آئی جی جیل خانہ جات محمد اسلم ملک نے واقعے کی تحقیقات کا حکم دے دیا ہے۔
ڈان نیوز کے مطابق کراچی کی ملیر جیل سے جاوید نامی قیدی اُس وقت فرار ہو اجب پولیس اسے جیل حکام کے حوالے کرنے اپنے ہمراہ لائی تھی۔
ڈی آئی جی جیل خانہ جات محمد اسلم ملک نے واقعے کی تصدیق کرتے ہوئےکہا ہے کہ ملزم جاوید ملیر جیل کے دروازے سے فرار ہوا ہے، اہلکاروں کی غفلت پر تحقیقات کا آغاز کر دیا ہے۔
ڈی آئی جی جیل نے بتایا کہ قیدی کو جیل حکام کے حوالے نہیں کیا گیا تھا، پولیس پارٹی ملزم جاوید کو جیل کے حوالے کرنے آئی تھی۔
واضح رہے کہ رواں برس 3 جون کو کراچی جیل سے 128 قیدی فرار ہو گئے تھے، بعد ازاں 88 قیدیوں کو پکڑ لیا گیا تھا۔
واقعے کی درج ایف آئی آر کے مطابق 3 جون کی رات 12 بج کر 5 منٹ پر کراچی میں زلزلے کے جھٹکے محسوس ہوئے تھے، زلزلے کے دوران قیدیوں نےچیخ و پکار کر کے دوسرے قیدیوں کو اکسایا، جس پر سیکیورٹی اہل کاروں نے حالات کنٹرول کرنے کی کوشش کی تاہم حالات قابو سے باہر ہوگئے۔
ایف آئی آر کے متن میں مزید لکھا گیا کہ قیدی ٹاور کی جانب آئے اور ایک اہلکار سے اسلحہ چھین کر فائرنگ شروع کر دی، فائرنگ سےاسپتال، مین گیٹ اور دیگر املاک کو نقصان پہنچا، ان حالات کا فائدہ اٹھا کر قیدی فرار ہو گئے۔
لائیو ٹی وی