فوٹو -- اختر بلوچ --. اتوار کے دن کراچی، صدر کے علاقے میں واقع مارکیٹیں بند ہوتی ہیں۔ صدر کی چوڑی سڑکوں پر جن میں عام دنوں پیدل چلنا بھی محال ہوتا ہے۔ اس دن صدر کی سڑکیں موٹر گاڑیوں اور عام لوگوں کے لیے اپنا دل کھولے بیٹھی ہوتی ہیں۔ مگر وہ بھی جانتی ہیں کہ یہ کرا چی کے باسیوں کے آرام کا دن ہے، اس لیے مایوسی کا شکار رہتی ہیں۔ پھر لمبی تان کے سو جاتی ہیں۔ ریگل چوک کے ساتھ ایک سڑک ایسی ہے جو مسرور و شاداں رہتی ہے۔ اتوار کا دن اس کے لیے عید، کرسمس یا ہولی سے کم نہیں ہے۔ اتوار کو یہاں آنے والوں میں مسلمان، ہندو، عیسائی سب ہی شامل ہیں۔ سڑک کے لیے ایک قابل فخر بات یہ بھی ہے کہ یہاں آنے والوں میں ہر طبقہ فکر کے لوگ شامل ہیں۔ یہاں مختلف سیاسی نظریات رکھنے والے لوگ بھی آتے ہیں۔ ان میں محقق ہیں تو شاعر بھی مذہبی اکابر بھی تو قوم پرست بھی لیکن یہ سب بغیر کسی تفریق کے اُس کی میزبانی سے لطف اندوز ہوتے ہیں۔ اور ہر کوئی اپنی استطاعت اور ذوق کے مطابق خریداری بھی کر رہا ہوتا ہے۔ آپ بھی سوچتے ہوں گے کہ میں کیا قصہ لے بیٹھا کراچی جہاں روز دسیوں افراد زبان رنگ نسل اور مذہب کے نام پر قتل کیے جاتے ہوں، کیا کوئی ایسی مہربان سڑک کا وجود بھی ہے جو تمام تعصبات سے بالاتر ہو کر اپنے مہمانوں کے لیے فرش دل راہ کیے بیٹھی ہو۔ جی ہاں یہ سڑک موجود ہے۔ ریگل چوک جو کبھی آمروں کے خلاف سیاسی سرگرمیوں کا مرکز ہوتا تھا یہ اُس سے متصل ہے۔ بھلا ہو ہمارے اخبار نویسوں کا جنھوں نے سیاسی پارٹیوں کو سمجھا دیا کہ ریگل چوک پر مظاہرہ کرنے سے ان کی کوریج میں کمی رہ جاتی ہے۔ اس لیے اب یہ تمام مظاہرے کراچی پریس کلب پر ہوتے ہیں۔ چلیں چھوڑیں اس پر پھر کبھی بات کریں گے۔ ہاں تو ذکر کرتے ہیں سڑک کا۔ اس سڑک پر اتوار کی صبح 8 بجے سے ہی میزبان مہمانوں کے لیے چیزیں لے کر پہنچنا شروع ہو جاتے ہیں۔ وہ یہ سامان رکشوں، سوزوکی پک اپ، موٹر سائیکلوں اور ٹھیلوں پر لے کر پہنچتے ہیں۔ کمال یہ ہے کہ ہر میزبان کے پاس اپنی ورائٹی ہوتی ہے لیکن چیز ایک ہی ہوتی ہے اور وہ ہے کتاب۔

فوٹو — اختر بلوچ –. جی ہاں، ہم ہر اتوار کو ریگل چوک سے متصل سڑک پر پرانی کتابوں کی نمائش کا ذکر کر رہے ہیں۔ اگر آپ کو ہمارے لکھے پہ اعتبار ہو تو کبھی آ کر آزما لیں۔ اگر آپ ریگل کی جانب سے سڑک پر داخل ہوں گے، تو دو انتہائی خوبصورت سندھی بولنے والے کتب فروشوں ندیم اور اسلم سے آپ کا واسطہ پڑے گا جن کی مادری زبان اردو ہے. اگر آپ دوسری جانب سے سڑک پر داخل ہوں گے تو پنجابی بولنے والے الیاس صاحب نئی چھپی ہوئی کتابیں لیے بیٹھے ہوں گے۔ اس کے فوراً بعد ایک اردو بولنے والے صاحب بچوں اور بڑوں کی کتابیں لیے آپ کے منتظر ہوں گے۔ ان کے بعد ایک پختون اردو ادب پر مبنی کتابیں فروخت کر رہے ہوں گے۔ ان کے بالکل سامنے ایک کیتھولک عیسائی نوجوان ٹھیلے پر کتابیں سجائے بیٹھا ہے۔ اس کے پاس کتابیں بہت زیادہ نہیں اور بیشتر عیسائی تبلیغی اداروں کی چھاپی ہوئی ہیں۔ اس طرح آپ آگے بڑھتے رہیں، ایک سفید داڑھی والے بروہی صاحب کتابیں سجارہے ہوں گے۔ انھیں کتابیں سجاتے سجاتے صبح سے سہ پہر ہو جاتی ہے۔ اس کے بعد وہ کتابیں دوبارہ بوروں میں ڈالنا شروع کرتے ہیں۔ کتابیں سجانے اور دوبارہ بوروں میں ڈالنے کا یہ عمل صبح سے شام تک جاری رہتا ہے۔ اُس دوران اگر کوئی ان سے کتاب کی قیمت پر بھاؤ تاؤ کرے تو اُسے کتاب کی سن اشاعت کا حوالہ دے کر یہ بتاتے ہیں کہ جب کتاب چھپی کاغذ کا ریٹ کیا تھا اور اب کیا ہے۔ اُس وقت کتابیں کمپیوٹر پر لکھنے کے بجائے کاتب لکھا کرتے تھے۔ ان کی پوری کوشش ہوتی ہے کہ خریدار کتاب نہ خریدے اور اگر خریدنے کی ہمت کرلے تو ان کی قیمت پر خرید لے۔

فوٹو -- اختر بلوچ --. ان سے کچھ فاصلے پر ایک خان صاحب اپنی کتابیں سجائے بیٹھے ہوتے ہیں۔ یہ سیاسی طور پرخاصے با شعور ہیں۔ اگر ان سے آپ کو سستی کتاب لینی ہے تو ان کے دو تین سوالات کا جواب ان کی مرضی کے مطابق دینا ضروری ہے۔ پہلا سوال کراچی کے حالات کے بارے میں ہوتا ہے۔ جس میں آپ کی جانب سے جواب یہ ہونا چاہیے؛ 'حالات کچھ بھی ہوں پختونوں کے ساتھ بڑا ظلم ہو رہا ہے'۔ دوسرا سوال صدرزرداری کے بارے میں ہو گا اور اگر آپ نے کہہ دیا کہ اگلی باری پھر زرداری تو پھر کیا کہنے۔ اس کے بعد وہ زرداری کی ذہانت پر ایک مختصر خطاب کر کے کتاب آپ کو آپ کی اپنی پسندیدہ قیمت پر دے دیتے ہیں۔ اس دوران متعلقہ تھانے کی پولیس کی ایک گشتی وین بھی وہاں ایک آدھ چکر لگاتی ہے۔ غلط فہمی میں مبتلا ہونے کی ضرورت نہیں یہ آپ کی حفاظت کے لیے نہیں بلکہ کتب فروشوں سے اپنا حصہ وصول کرنے آتی ہے۔ اس کتابی میلے کی تاریخ کے بارے میں مختلف لوگوں کی مختلف راۓ ہے۔ کوئی اس کی عمر تیس سال بتاتا ہے تو کوئی پچیس سال لیکن اس سلسلے میں مستند تاریخ معروف ترقی پسند محقق احمد سلیم نے اپنی کتاب "فیض : یادیں، باتیں" میں کچھ یوں بیان کی ہے؛ "1964 میں ماہنامہ افکارنے فیض نمبر نکالنے کا اعلان کیا۔ فیض کے بارے میں اس خصوصی اشاعت میں پاکستان بھر کے طلباء و طالبات کو دعوت دی گئی تھی کہ وہ فیض پر بہترین نثری اور منظوم تخلیقات کے مقابلے میں شرکت کریں۔ میں نے اس حوالے سے اپنی نظم ’مدیر افکار‘ کو بھیجی۔ اس کے بعد ان کی جانب سے مجھے ایک خط ملا کہ ججوں کے پینل نے میری نظم کو بہترین قرار دیا ہے۔ آخر وہ دن بھی آگیا کہ جب میں نے فیض صاحب کے دست مبارک سے انعام کی شکل میں کتابوں کا پیکٹ وصول کیا۔ میں اس دن کو آج تک فراموش نہیں کرسکا۔ حال یہ تھا کے بھوک اور نقاہت کے باعث مجھ سے چلا تک نہیں جارہا تھا اورکتابوں کا بڑا بنڈل اٹھانا مشکل ہورہا تھا۔ تقریب سے میں سیدھا ریگل چوک کی پرانی کتابوں کی دکانوں پر گیا۔ پیکٹ کھول کر چھ کی چھ کتابیں اونے پونے بیچ دیں۔ دکاندار فیض کی دستخطوں والی کتابیں دیکھ کر پھولا نہں سما رہا تھا۔ اس نے مجھے پورے تیس روپئے دئیے۔ میں پیسے جیب میں ڈالے، سیدھا کافی ہاؤس کی جانب لپکا اور کئی مہینوں بعد پیٹ بھر کر کھانا کھایا۔ یہ پرمسرت عیاشی میں کبھی نہیں بھول سکتا۔ میں پیر الٰہی بخش کالونی کی ایک مسجد کے حجرے میں دس روپے ماہانہ کرائے پر رہتا تھا۔ اس واقعے کو تین چاردن گزرے ہونگے جب ماہنامہ افکار سے کوئی مجھے ڈھونڈتا ہوا وہاں پہنچا۔ صہبا لکھنوی کاپیغام تھا کہ میں انہیں فوراً ملوں۔ میں پہنچا تو وہ غصے میں بھرے بیٹھے تھے، چھوٹتے ہی بھولے، میاں یہ نظم کسی سے لکھوائی ہے یا چوری کی ہے؟ میں ساری کہانی سمجھ گیا۔ میرے پاس اس سوال کا کوئی جواب نہ تھا کہ میں نے انعامی کتابیں ردی میں کیوں بیچیں۔ وہ دیرتک مجھے کو ستے رہے۔ اس کے بعد مجھے حکم دیا کہ میں فیض صاحب کو ہارون کالج، لیاری جہاں وہ پرنسپل تھے، جاکرملوں۔ دوسری صبح میں ہارون کالج جو عرف عام میں کھڈا کالج بھی کہلاتا تھا، پہنچ کر فیض صاحب کے سامنے پیش ہوا۔ مجھے دیکھ کر ایک نرم مسکراہٹ ان کے لبوں پر آئی اور ہاتھ کے اشارے سے بیٹھنے کو کہا۔ میں کرسی پربیٹھ گیا توبولے؛ ’’بھئی ہم آپ کا تفصیلی تعارف چاہتے ہیں‘‘۔ میں نے انہیں مختصرابتایا۔ کبھی کبھی اتنے پیسے بھی نہیں ہوتے کہ پیٹ کی آگ بجھا سکوں۔ مجبوراً آپ کی انعامی کتابیں فٹ پاتھ پر بیچنا پڑیں۔ وہ دوبارہ مسکرائے اور کہا، "بھئی اس طرح توہم سب کے ساتھ ہوتا ہے"۔ ان کی گفتگوکا لب لباب یہ تھا کہ میں اردو کالج چھوڑ کر ان کے کالج میں آجاؤں، کتابیں اور داخلہ مفت ہوگا اور جلد ہی نوکری کا بندوبست ہوجائے گا۔ اٹھتے وقت انہوں نے وہ کتابیں دوبارہ مجھے تھمادیں جوفٹ پاتھ سے غالبا سحر انصاری صاحب نے خرید کر انہیں پہنچائیں تھی"۔ احمد سلیم کی اس روایت کے بعد اندازہ ہوتا ہے کہ یہ کتابی میلہ کم از کم 50 سالہ سال پرانا ہوگا ہے۔ صدر ٹاؤن کا صفائی کرنے والا عملہ بھی بیچنے والوں اور خریداروں دونوں کے مزاج کو سمجھتا ہے۔ ہر کتاب کے اسٹال کے ساتھ ایک کچرے کا ڈھیر ضرور نظر آتا ہے۔ یہ کتابوں اور کچرے کا ایک حسین امتزاج نظر آتاہے۔ شاید انھیں معلوم ہے کہ کتابیں بیچنے والے کتابیں ردی کے بھاؤ پر لے کر آتے ہیں۔ دونوں جانب کچرا ہی تو ہے۔ ایک اُٹھانے کے لیے دوسرا بیچنے کے لیے۔

فوٹو -- اختر بلوچ --. آخر یہاں کتابیں کہاں سے آتی ہیں؟ اس سوال کاجواب نامورمحقق عقیل عباس جعفری نے کچھ یوں دیا؛ "جو لوگ یہاں سے نادر و نایاب کتابیں خریدتے ہیں۔ بس ذرا اُن کے مرنے کی دیر ہوتی ہے۔ ان کی بیویاں اور بچے یہ کتابیں دوبارہ یہاں پہنچا دیتے ہیں۔ کتنا بڑا احسان کرتے ہیں یہ نئے پڑھنے والوں پر۔ ورنہ یہ کتابیں گھروں پر پڑی سڑتی رہیں۔ پھر دیمک انھیں چاٹ لے۔ اس سے بہتر ہے کہ یہ کسی کام آجائیں"۔ عقیل عباس کہتے ہیں کہ گھر والوں کی یہ سوچ بھی ہوتی ہے کہ گھر کا ایک کمرہ تو خالی ہو۔ سڑک کے میزبان ہر مہمان کے کوائف سے مکمل آگاہ ہوتے ہیں۔ جس میں عمر، پیسہ اور علاقہ بھی شامل ہوتا ہے۔ اگر کوئی مہمان 10 ہفتوں تک میزبان کو مہمانی کا شرف نہ بخشے تو عمر کے حوالے سے اُس کی غیر حاضری کی وجہ کا اندازہ لگایا جاتا ہے۔ اگر مہمان کی عمر 60 سے اوپر ہے تو اس کے کسی ہم خیال دوست سے اس کے بارے میں معلوم کیا جاتا ہے۔ اگر آپکا کوئی دوست متواتر نظر نہ آئے تو مہمان چپکے سے بتا دیتے ہیں کہ عباس کشمیری کی نعش پڑوسیوں نے چندہ کرکے آزاد کشمیر بھجوادی ہے۔ اُس دن سڑک پر کشمیر کی تاریخ اور جدو جہد آزادی کے حوالے سے بے شمار کتابیں ایک اسٹال پر موجود تھیں۔ ایک دن ایک میزبان کے اسٹال پر شیعہ مذہب کے حوالے سے بے شمار کتابیں موجود تھیں۔ ایک آدھ میں نے بھی خرید لی میزبان نے مجھے خاموشی سے بتایا رضوی صاحب کا انتقال ہو گیا۔ اس کے بعد میں نے معلوم کرنا چھوڑ دیا۔ بس کتابیں دیکھ کر اندازہ کر لیتا ہوں کہ شیعہ، بریلوی، دیو بندی، عیسائی، سُرخا، شاعر یا دانشور کون مرا ہے۔ میرا سابقہ ہندوستانی صدر عبدالکلام سے مکمل تعارف بھی اسی سڑک پر ہوا۔ مجھے پہلی بار معلوم ہوا کہ ان کا پورا نام ابولفخر جین العابدین عبدالکلام ہے۔ میرا خیال ہے 'جین العابدین' سے مراد زین العابدین ہے ان کی سوانح عمری پر ان کے دست خط ہیں۔ یہ کتاب کان پور کے کسی کتابی میلے میں سے خریدی گئی تھی اس کے بعد ایمیسٹرڈیم گئی اس کے بعد اس بازارمیں پہنچ گئی۔ ایک اور کتاب جو مشہور ہندوستانی مصور ایم ایف حسین کی سوانح عمری ہے اور اس پر ان کے دستخط بھی ہیں وہ بھی یہیں ملی۔ ایک اور کتاب جو نامور نقاد محمد علی صدیقی نے ایک دوست کو اپنے دستخط کے ساتھ پیش کی تھی اسی سڑک سے ملی. ہمارے دوستوں شاہد بھائی، عقیل عباس جعفری کے پاس ایسی بے شمار کتابیں ہیں اب تو کسی مصنف کی کتاب لینے کے بعد کتاب پر اس کے دستخط کراتے ہوئے کئی بار سوچنا پڑتا ہے کہ لوگ ہمارے بیوی بچوں کے بارے میں کیا سوچیں گے؟

  اختر حسین بلوچ سینئر صحافی، مصنف اور محقق ہیں. سماجیات ان کا خاص موضوع ہے جس پر ان کی کئی کتابیں شایع ہوچکی ہیں. آجکل ہیومن رائٹس کمیشن، پاکستان کے کونسل ممبر کی حیثیت سے اپنے فرائض انجام دے رہے ہیں  

تبصرے (16) بند ہیں

Junaid Naseer Faroqui Apr 19, 2013 06:59am
An eye opening fact encapsulated in sarcasm... It has rather become our national attitude that we don't read and do not even encourage to read. I always recall and believe a beautiful quotation that 'Readers Are Leaders'
bilal zafar Apr 19, 2013 07:51am
great work i really appreciate your work to highlight karachi old consistuencies, keep it up.
عطااللہ ذکی ابڑو. نوائے وقت کراچی Apr 19, 2013 01:41pm
بھئی واہ بلوچ صاحب آپ نے توردی کے مول بکنے والی کتابوں کے ساتھ صاحب کتاب کے دیوانوں کاجو نقشہ کھینچا ھے وہ پڑھ کرتو اب ھم کبھی صاحب کتاب ھونے کاشرف سوچ سمجھ کرہی کریں گے. مانا کہ پیٹ سب کچھ کراتا ہے مگرکتاب جو ھماری تنہائی کا بہترین دوست ہوتی ھے اس کے ساتھ یہ برتاو؟؟؟؟ رونا آتاہے جناب... آپ نے ایک بہترین موضوع کا انتخاب کرکے جو کتاب دوستی کا ثبوت دیا ھے وہ انشااللہ کبھی رائیگاں نہی جائے گا، ہمیں امید ہے کہ بلوچ صاحب کی یہ کوشش کسی حد تک کتابوں کو فٹ پاتھوں کی زینت بننے سے روک سکے گی،،،اوربلوچ صاحب کے قلم سے کتاب دوستی کایہ سفر بھی ھمیشہ جاری وساری رہے گا
Sadia Baloch Apr 19, 2013 01:49pm
bohot dilshap tarz e tehrir hy aap ka or shukriya k iss bahany karachi ki purani shakal bhi nazar ajati hy woh ky ahy k iss sheher k log iss ki tarikh or khobssortiyon se aagah nahi aap jeson ki tehrir se kuch afaqa hota hy.
وقار احمد وقار Apr 19, 2013 04:42pm
کیا ہی اچھا نقشہ کھینچا ہے اختر بھائی آپ نے خاص طور پر کتاب کا گھر کے کتب خانے سے سڑک پر لگے ٹھیلے تک کا سفر پڑھ کر "شجرہ " یاد آ گیا. ویسے کئی بار آپ کے کتب خانے میں بیٹھنے کا شرف بھی ناچیز کو حاصل ہوا ہے مگر میں اُس روز کا منتظر نہیں جب وہ کتابیں ریگل چوک تک پہنچیں گی.
Muhammad Junaid Shaikh Apr 19, 2013 05:05pm
Tarz-e- Bayan Bohut Aala hy or Manzar Nigaari ne to chaar chand laga diye, bohut khoob . Allah Aap ki tehreer main mazeed dilkashi peda kary
Amin Zamin Baloch Apr 19, 2013 05:32pm
Mr Baloch, writing language is very nice, sentence are not propositions but, he is not committing hast generalization fallacy of formal deductive logic; accordingly, Halden says ''every thing has history". let suppose his article is a things; thus, his article has history, on the ground of deductive logic.... if it is abscure, let rest, i tell a tale but wait a while.........
danish Nafees Apr 19, 2013 06:09pm
bohat umda tehreer he akhthar bhai ap ke. parh kar malomat me izafa hua. ap aese he thereer likha karen.... so nice
aadarshlaghari Apr 19, 2013 07:46pm
اختر صاحب تعریف کا تو شرف بڑے لوگوں‌ کو حاصل ہے. لیکن آپکے اس بلاگ کے سلسلے پر کچھ کہنا چاہتا ہوں. کراچی کی سڑکوں کو اگر یاد کرتا بھی ہوں تو آپ کی کہانیاں یاد آتی ہیں. پھر سوچنے پر مجبور ہوجاتا ہوں کہ وہ کہانی جو آپ کی بتائی ہوتی ہے اس میں‌ سے اگر آپ کو خارج کردوں تو واقعی کہانی میں‌ جان ہی باقی نہ رہے. میرے معزز استاد، آپ کی تحریر پڑھتے ہوئے آپ کا منفرد انداز بھی یاد آرہا ہے اور بہت خوشی ہوتی ہے کہ ایک طرف آپ یہ قیمتی کہانیاں‌ قارعین تک پنہنچا رہے ہیں‌ اور دوسری جانب آپ کے ہم جیسے چاہنے والے آپ کی کہانیاں بھی سن سکتے ہیں. نہ جانے کیوں‌ مجھے اب انتظار ہے کہ کراچی کہ علاوہ دیگر شہر بھی جلد آپکی تحریروں کا حصہ بنیں. لیکن ترجیح‌ کا حقدار کراچی سے بہتر اور کوئی نہیں‌ ہو سکتا تھا.
Tanveir Arain Apr 20, 2013 09:05am
اختر بلوچ صاحب ہمیشہ کی طرح اس بلاگ نے بھی مجھے ہلا کر رکھ دیا آپ کی تحریر کو پڑھ کر اس میں سموئی ہوئی کہانی آنکھون کے سامنے آ جاتی ہے اور آدرش لغاری صاحب نے بالکل صحیع کہا کہ ہم ان خوش نصیبوں میں شامل ہیں جو آپ کو براہ راست سننے اور سمجھنے کی سعادت حاصل کرتے رہتے ہیں لیکن ایک بات ہے جس انداز سے آپ کوئی تحریر لکھتے ہیں وہ اور بھی ذیادہ اثر انداز ہوتی ہے.
ghazanfarabbass Apr 25, 2013 02:14pm
مرشد بہت عمدہ ۔ یقین کریں ایمان تازہ ہوگیا۔ آپ کا اسلوب بھی خوشگوار حیرت کا سبب بنتا جا رہاہے۔ لو یو سوہنا
Kashif Sarmad Jul 16, 2013 06:06pm
Your this write up has great mixture of fun and knowledge. This is the best way to remember our great writers and scholars. I appreciate your efforts to enlighten us regarding our culture and history which surely proves that we were a nation in the past. Regards Kashif Sarmad Karachi based Journalist.
abid raza Jul 24, 2013 05:38pm
It is immense pleasure that Mr. Akhtar Baloch ahs written the shor history of Karachi Old Book Bazar. I would like to point out that besides this Bazar there are certain fixed Book Thela Walas avaialable in city through out the week days from 9 to 5. Some are at Hasan Square, Malir 15, Guru Mandar, Karim Abad & water pump etc. I apprciate the impressive write up by the writer. It gives a feeling as you are reading a interesting story. Thank you Akhtar Sahab.
rai Sep 12, 2013 12:34pm
"BOOK SELLERS CONTACT" I need used books, please publish address of these booksellers. Thank You. Thank You
rai Sep 12, 2013 01:08pm
I need books on Allama Mashriqi, founder of Khaksar Tehrik. Does any one carry books written by Nasim Yousaf? I am also interested in "Tazkirah" Tazkirah By Allama Mashriqi ____________________________________________ “The First volume of ‘Tazkirah’ published in 1924 has four sections. The first which is in Arabic constitutes the author’s main theorem on the rise and fall of human societies, and a verdict on the fluctuating fortune of the world Muslim community. The three sections following the Arabic text are in Urdu and consist of a 132-page Preface, a 100-page Introduction, and 172-page text of the book proper. The Introduction deals with the Quranic version of the law of man’s evolution as a species and the collective conduct of human societies determining their ultimate destiny. The Preface which precedes it discusses the conflict between various religions — the distortion of the Message brought by the prophets, the tussle between Religion and Science, and the compelling necessity to resolve these conflicts before mankind becomes extinct through its own follies… Even when analyzing the fate of human communities and man’s ultimate destiny, Mashriqi has looked on everything as a mathematician. It was as a mathematician that he discussed in 1926 the theme with Einstein on his return from Cairo via Germany, and tried to impress upon him to come out of the shell of a mere physicist. In his address to the mathematical society of Islamia College Peshawar in November 1928…he made a particular reference to it. He said, ‘If I have presented a book (Tazkirah Ed.) to the world that has no peer it is because of mathematics. If I had left mathematics and gone on to higher things it is through mathematics. If I have left studying mathematics and have seen a higher truth in the Koran its through mathematics. In fact, the first truth of the Koran dawned on me while I was busy day and night preparing for the Mathematics Tripos at Cambridge’.” Source:Inayat ullah Khan El-Mashriqi: God, Man And Universe: As Conceived by a Mathematician. Edited by Syed Shabbir Hussain. First Impression, November, 1980, p. 25 http://www.allamamashriqi.com/tazkirah.html
a. s. salami Sep 18, 2013 07:13am
اختر بلوچ صاحب بہت اچھی تحریر ہے۔ جی خوش ہوگیا۔ سلامی