پشاور: وفاقی وزیرِ داخلہ چوہدری نثار علی خان نے جمعرات کو کہا ہے کہ ملکی سلامتی کیلئے اہم فیصلے کئے گئے ہیں اور جلد ہی ان کا اعلان کیا جائے گا۔

ڈان نیوز کے مطابق گورنر ہاؤس پشاور میں ایک پریس کانفرنس سے خطاب کرتے ہوئے کہا گزشتہ چند دنوں میں ہونے والے واقعات کے باوجود تحریکِ طالبان پاکستان ( ٹی ٹی پی) سے مذاکرات اب بھی حکومتی ترجیح ہے۔

انہوں نے کہا کہ حکومت ملک میں امن کے لئے خلوص سے کام کررہی ہے اور اس ( نئے اقدامات سے) سے آگے کی راہ میں موجود تمام رکاوٹیں دور ہوجائیں گی۔

وزیرِ داخلہ نے کہا کہ ملکی سرزمین پر تشدد برداشت نہیں کیا جائے گا اور حکومت ان تمام حملوں کا مناسب جواب دے گی۔

انہوں نے کہا کہ سیکیورٹی فورسز کو باہر سے حاصل کردہ تمام اہم آلات فراہم کردیئے گئے ہیں اور پولیس سمیت سیکیورٹی فورسز کو نئی گاڑیاں بھی فراہم کی جائیں گی۔

اس سے قبل اجلاس میں خیبرپختونخواہ کے وزیرِ اعلیٰ پرویز خٹک، گورنر انجینئر شوکت اللہ اور انسپیکٹر جنرل ( آئی جی ) پولیس ناصر درانی نے بھی شرکت کی۔