سلمان بٹ نے پی سی بی سے مدد مانگ لی
لاہور: سپاٹ فکسنگ کی وجہ سے پابندی کے شکار سابق کپتان سلمان بٹ امید کر رہے ہیں کہ پاکستان کرکٹ بورڈ ان کی معطلی جلد ختم کرنے میں مدد کرے گا۔
انٹرنیشنل کرکٹ کونسل نے انگلینڈ کے خلاف لارڈز ٹیسٹ میں سپاٹ فکسنگ کرنے والے بٹ پر ستمبر، 2010 میں پانچ سال کیلئے پابندی عائد کر دی تھی۔
بٹ کے علاوہ محمد عامر اور محمد آصف بھی اس واقعہ پر پابندی کا نشانہ بنے تھے۔
آئی سی سی نے پیر کو اپنے انسداد کرپشن کوڈ میں ترامیم کی منظوری دی تھی جس کے بعد پابندی کی معیاد ختم ہونے سے پہلے کھلاڑیوں کے ڈومیسٹک کرکٹ میں کھیلنے کی راہ ہموار ہو گئی ہے۔
امید کی جا رہی ہے کہ پی سی بی اگلے سال اگست تک ختم ہونے والی پابندی کو جلد ختم کرانے میں عامر کی مدد کرے گا تاہم آصف اور بٹ کو معاونت ملنے کا امکان نظر نہیں آ رہا۔
بٹ امید کر رہے ہیں کہ پی سی بی ان کی بھی مدد کرے گا۔
’میرا روزگار کرکٹ سے وابستہ ہے۔ مجھے امید ہے کہ پی سی بی میری اپیل بھی سنے گا کیونکہ کرکٹ میں واپس آنے کا یہ میرا واحد موقع ہے‘۔
پی سی بی چیئرمین شہریار خان نے ابو ظہبی میں اے ایف پی کو بتایا کہ بٹ اور آصف نے اپنا بحالی پروگرام مکمل نہیں کیا لیکن سابق کپتان بٹ اس دعوی کو چیلنج کر رہے ہیں۔
’یہ جاننے کیلیے کہ مجھے بحالی پروگرام مکمل کرنے کے لئے اور کیا کرنا ہو گا، میں گزشتہ ایک سال میں درجنوں مرتبہ پی سی بی دفاتر کے چکر لگا چکا ہوں لیکن مھے ابھی تک کوئی جواب نہیں ملا‘۔
لائیو ٹی وی