دہشت گردی سے نمٹنے کے لیے طالبات کی ٹریننگ
کراچی: پشاور کے آرمی پبلک اسکول پر دسمبر میں ہونے والے دہشت گردوں کے حملے میں بچوں سمیت 140 افراد کی ہلاکت کے بعد یہ بات سامنے آگئی ہے کہ اسکول ان دہشت گردوں کا آسان ہدف ہو سکتے ہیں جس کے پیش نظر پاکستان کی وفاقی اور صوبائی حکومتوں کی جانب سے تعلیمی اداروں کو سیکیورٹی فراہم کرنے کے حوالے سے انتہائی اقدامات شروع کردیئے گئے ہیں۔
ملک بھر کے اسکول کے اسٹاف اور طلبہ کو جمعرات کے روز مبینہ حملے کی صورت میں ایمرجنسی ٹرینگ کروائی گئی، جس میں ہر قسم کے دہشت گردی اور دیگر حملوں کی صورت میں اپنے بچاؤ کے طریقے سکھائے گئے۔
|
پنجاب حکومت کی ہدایات پر ریسکیو اہلکاروں نے سول ڈیفنس، بم ڈسپوزل اسکورڈ کے عملے اور سیکیورٹی اہلکاروں کے ساتھ ملتان کے پبلک اسکول کے اسٹاف اور طالبات کو ایمرجنسی اور دہشت گرد حملوں کی صورت میں اپنی حفاظت کے اقدامات کے بارے میں آگاہ کیا۔
اس موقع پر ایک خصوصی تربیت کا انعقاد کیا گیا جس میں بم ڈسپوزل اسکواڈ (بی ڈی ایس) کے عملے نے بم کو ناکارہ بنانے کے حوالے سے معلومات فراہم کیں۔ اس دوران سیکیورٹی اہلکاروں نے اسکول کی عمارت کو گھیرے میں لیے رکھا۔
تربیت میں شامل طالبات کا کہنا تھا کہ وہ دہشت گردی سے خوف زدہ نہیں ہیں۔
ملتان اسکول کی ایک طالبہ کا کہنا تھا کہ ’وہ یہاں تربیت حاصل کررہی ہیں اور اس تربیت کو زندگی کے مختلف حصوں میں استعمال کریں گی‘۔
ریسکیو اہلکاروں نے طالبات کو زخمیوں کو ابتدائی طبی امداد کی تربیت بھی فراہم کی۔
ضلعی افسر ریسکیو 1122 ڈاکٹر رضوان کا کہنا تھا کہ ’ہمیں ہدایات جاری کی گئی ہیں کہ طالبات کو ایمرجنسی سے نمٹنے کی تربیت فراہم کی جائے کیونکہ طلبہ کے مقابلے میں طالبات مختلف حادثات اور حملوں میں زیادہ خوف کا شکار ہوتی ہیں‘۔
ڈی سی او ملتان زاہد سلیم گوندل کا کہنا تھا کہ پنجاب حکومت کی ہدایت پر شہر کے تمام اسکولوں میں اس طرح کے سیشن رکھے جائیں گے۔
اسی طرح کا ایک تربیتی کیمپ کراچی میں بھی منعقد کیا گیا جہاں پولیس نے ایک معروف اسکول کے اسٹاف اور طالبات کو رزاق آباد ٹرینگ سینڑ میں تریبیت فراہم کی۔ تربیب کے دوران طالبات اور اساتذہ کو اپنے دفاع اور اسلحہ چلانے کی تربیت دی گئی۔
طالبان کے حملوں اور شمالی وزیرستان میں پاک فوج کی جانب سے دہشت گردوں کے خلاف کارروائی کے ممکنہ ردعمل کے پیش نظر ملک بھر کے اسکولوں اور دیگر اہم مقامات پر سیکیورٹی کے خصوصی اقدامات کیے گئے ہیں۔
یاد رہے کہ گزشتہ ماہ خیبر پختونخوا میں بھی اساتذہ کو اسلحہ چلانے کی تربیت بھی فراہم کی گئی تھی۔
لائیو ٹی وی