راولپنڈی: منشیات کی موجودگی کی اطلاع پر حکام نے پاکستان ایئرلائنز (پی آئی اے) کی اسلام آباد سے دبئی جانے والی فلائٹ کو کراچی میں لینڈ کروانے کا حکم دیا۔

اسلام آباد سے دبئی جانے والی فلائٹ پی کے 211 بلوچستان کی فضائی حدود میں داخل ہوئی تو حکام کی جانب سے طیارے کے کپتان کو قریبی ایئر پورٹ پر اترنے کا حکم دیا گیا جس پر کپتان نے طیارے کا رخ کراچی کی جانب موڑا اور اسے جناح انٹرنیشنل ایئرپورٹ پر لینڈ کروادیا۔

سراغ رساں کتوں کی مدد سے طیارے کی سرچنگ کی گئی اور طیارے میں لگے کیبنٹس کے پیچھے سے 3.1 کلو ہیروئن برآمد کی گئی۔

ہیروئن کے مذکورہ 6 پیکٹس ٹشو پیپر کیبنٹ کے پیچھے چھپائے گئے تھے۔

ایئر پورٹ ذرائع کے مطابق طیارہ گذشتہ روز بینظیر انٹر نیشنل ایئر پورٹ سے دوپہر 12 بجکر 50 منٹ پر روانہ ہوا تھا۔

پی آئی اے ترجمان کے مطابق پرواز کے دوران پی آئی اے کے عملے کو طیارے میں منشیات کی موجودگی کا سراغ ملا جس پر انھوں نے ایئر ٹریفک کنٹرول کو اطلاع فراہم کی تھی۔