تنقید کا جواب پیار سے دوں گا: عامر
اسپاٹ فکسنگ الزامات ثابت ہونے پر جیل میں وقت گزار چکے تیز گیند باز محمد عامر نے کہا ہے کہ وہ ناقدین کو جواب پیار اور اپنی وکٹوں سے دیں گے۔
بائیں ہاتھ سے گیند کرنے والے باؤلر کو جمعے کے روز دورہ نیوزی لینڈ کے لیے ون ڈے اور ٹی ٹوئنٹی اسکواڈ کا حصہ بنایا گیا ہے۔
پانچ سال پابندی کا شکار رہنے والے گیند باز اس کے خاتمے کے چار ماہ سے بھی کم عرصے کے بعد ٹیم میں واپسی کررہے ہیں۔
تاہم ان کی واپسی پر ہر کوئی خوش نہیں۔ گزشتہ ہفتہ ون ڈے کپتان اظہر علی اور بلے باز محمد حفیظ نے ٹریننگ کیمپ کے دوران عامر کا بائیکاٹ کردیا تاہم بعدازاں چیئرمین پی سی بی شہریار خان کی مداخلت کے بعد بظاہر معاملات حل ہوگئے۔
خبر رساں ادارے اے ایف پی کو انٹرویو میں عامر نے کہا کہ انہیں اعتماد ہے کہ زیادہ تر مداح ان کی حمایت کررہے ہیں۔
'مجھے یقین ہے کہ شائقین مجھ سے پیار کرتے ہیں، لیکن اگر مجھے سخت جملوں یا طعنوں کا سامنا بھی کرنا پڑتا ہے تو میں اس کے لیے تیار ہوں اور ان کا جواب میں پیار اور وکٹیں لے کر دوں گا۔'
پاکستان رواں ماہ ہونے والے دورہ نیوزی لینڈ کے دوران تین ٹی ٹوئنٹی اور تین ون ڈے میچز کھیلے گا تاہم عامر کی دورے پر دستیابی نیوزی لینڈ کے ویزے سے مشروط ہے۔
2010 کے دورہ انگلینڈ کے دوران اسپاٹ فکسنگ کے الزام کا اعتراف کرنے کے بعد باصلاحیت فاسٹ باؤلر نے چھ ماہ نوجوانوں کی جیل میں گزارے تاہم انہیں تین ماہ بعد وہاں سے بری کردیا گیا۔
انہوں نے کہا کہ 'میں پہلے بھی نیوزی لینڈ کا دورہ کرچکا ہوں اور جانتا ہوں کہ وہاں کے لوگ کھیل کو بہت پسند کرتے ہیں اور بہت پیار اور دیکھ بھال کرنے والے ہیں اس لیے مجھے امید ہے کہ وہاں کچھ ناخوشگوار پیش نہیں آئے گا۔ مجھے یقین ہے کہ وہ مجھے پسند کریں گے۔'
دوسری اننگ
معطلی سے پہلے عامر کو بین الاقوامی کرکٹ میں سب سے باصلاحیت کھلاڑیوں میں شمار کیا جاتا تھا۔
ڈیبو کے بعد سے انہوں نے 14 ٹیسٹ میچوں میں 51، 15 ایک روزہ میچوں میں 25 جبکہ 18 ٹی ٹوئنٹی میچز میں 23 وکٹیں لے رکھی تھیں۔
تاہم ڈومیسٹک کرکٹ کی کارکردگی کو مدنظر رکھتے ہوئے یہ کہنا غلط نہ ہوگا کہ عامر کی کرکٹ جہاں رکی تھی وہیں سے شروع ہوئی ہے۔
اب تک کھیلئے گئے چار روزہ اور ٹی ٹوئنٹی ڈومیسٹک میچوں میں عامر 86 وکٹیں حاصل کرچکے ہیں جبکہ حال ہی میں ہونے والی بنگلہ دیش پریمیئر لیگ میں بھی وہ فارم میں نظر آئے۔
عامر نے کہا کہ دوسرا موقع ملنے پر وہ شکر گزار ہیں۔
'دوسرا موقع ملنا بہت مشکل ہوتا ہے۔ یہ میرے ملک، حکام اور شائقین کی جانب سے بڑا تحفہ ہے کہ انہوں نے مجھے دوسرا موقع دیا۔'
انہوں نے بتایا کہ کرکٹ میں واپسی کے بعد انہوں نے کلب کرکٹ کھیلنا شروع کیا جن کے پاس مناسب کٹ تک موجود نہیں تھی۔
'تین میں سے ایک اسٹمپ ٹوٹی ہوئی تھی اور ہم 300 روپے کی گیند سے کھیل رہے تھے لیکن ان میچوں سے مجھے برا وقت بھلانے میں مدد ملی۔'
دورہ نیوزی لینڈ پر ٹی ٹوئنٹی 15، 17 اور 22 جنوری جبکہ ون ڈے 25، 28 اور 31 جنوری کو کھیلے جائیں گے۔
ٹی ٹوئنٹی ٹیم شاہد آفریدی(کپتان)، احمد شہزاد، افتخار احمد، محمد حفیظ، صہیب مقصود، شعیب ملک، عمر اکمل، عماد وسیم، سرفراز احمد، انور علی، عامر یامین، وہاب ریاض، عمر گل، محمد رضوان، سعد نسیم اور محمد عامر(شمولیت ویزا سے مشروط)
ایک روزہ ٹیم اظہر علی(کپتان)، احمد شہزاد، محمد حفیظ، اسد شفیق، شعیب ملک، بابر اعظم، صہیب مقصود، محمد رضوان، سرفراز احمد، انور علی، عماد وسیم، وہاب ریاض، راحت علی، محمد عرفان، ظفر گوہر اور محمد عامر(شمولیت ویزا سے مشروط)
لائیو ٹی وی