آسمان پر رنگین بادلوں کا معمہ
ہوا کے ساتھ نیلے آسمان پر اڑتی سفید روئی کے گالوں جیسی بدلیاں یا پھر برسات کے موسم میں سیاہ گہرے سائے بادل نظر آنا تو معمول کی بات ہے لیکن سنگاپور کے شہریوں نے جب آسمان پر نظر ڈالی تو کچھ الگ ہی منظر ان کا منتظر تھا۔
آسمان پر 15 منٹ تک رنگ بکھیرنے والے چمکدار بادل کے ٹکڑے نے سنگاپور کے شہریوں کو حیرانی میں مبتلا رکھا، انہوں نے اس منفرد نظارے کی تصاویر بنائیں اور دیکھتے ہی دیکھتے سوشل میڈیا پر اس انوکھے بادل کے ڈیرے نظر آنے لگے۔
میڈیا رپورٹس کے مطابق یہ بادل دراصل 'آتشیں قوس قزح' تھی جبکہ ایسا اس وقت ہوتا ہے جب سورج کی شعاعیں کسی بادل کے ٹکڑے سے پرزم کی طرح پار ہو کر سات رنگوں میں بکھر جائیں۔
سوشل میڈیا پر اس منفرد بادل کی تصویریں کھینچ کر شیئر کرنے والے افراد کا لکھنا تھا کہ 'بادل کا آغاز ایک نارنجی رنگ کے دائرے سے شروع ہوا جو دیکھتے ہی دیکھتے پھیلتا گیا اور اس میں مزید رنگ دکھائی دینے لگے'۔
اس انوکھے بادل کے ٹکڑے کو سنگاپور کے شہریوں نے الگ الگ ناموں سے پکارا، کسی کو یہ رنگین آئس کریم پیڈل پاپ جیسا دکھائی دیا تو کسی نے تبصرہ کیا کہ 'لگتا ہے قوس قزح کا پُل ٹوٹ گیا ہے'۔
لائیو ٹی وی