پاکستان اور مسلم دنیا کی پہلی خاتون وزیر اعظم بے نظیر بھٹو کی سالگرہ ہر سال 21 جون کو منائی جاتی ہے۔

بے نظیر بھٹو پاکستان کی 11ویں وزیر اعظم منتخب ہوئیں تھیں۔

پاکستان پیپلز پارٹی (پی پی پی) کی رہنما بے نظیر بھٹو کی سالگرہ کے موقع پر ملک بھر سے ہزاروں جیالے گڑھی خدا بخش پہنچتے ہیں۔

محترمہ بے نظیر بھٹو نے 21 جون1953ء کو پاکستان پیپلز پارٹی کے بانی چیئرمین قائد ذوالفقار علی بھٹو کے ہاں جنم لیا۔ 1976ء میں انہیں اپنے والد کی سیاسی مشیر مقرر کیا گیا۔ اپنے والد کی پھانسی کے بعد وہ عملی سیاست میں آئیں اور انہوں نے ملک میں جمہوریت کی بحالی ،قانون کی حکمرانی ، آئین کی بالادستی اور عوام کے حقوق کیلئے بھرپور جدوجہد کا آغاز کیا۔ 1977ء انہیں گھر میں نظر بند کردیا گیا ۔ 1986ء میں جلا وطنی کے بعد وطن واپسی پر ان کا شاندار استقبال کیا گیا۔ اس دوران محترمہ بے نظیر بھٹو کو اپنی والدہ کے ہمراہ پاکستان پیپلز پارٹی کی شریک چیئرپرسن منتخب کر لیا گیا اور بعد ازاں وہ پارٹی کی قائد مقرر ہوئیں۔

1988ء میں محترمہ نے انتخابات میں بھرپور طریقے سے حصہ لیا اور عوام کی حمایت سے ان کی پارٹی نے انتخابات میں اکثریت حاصل کی جس کے بعد محترمہ ملک کی پہلی خاتون وزیراعظم منتخب ہوئیں۔

محترمہ کے اسی دور میں پاکستان میں چوتھی سارک سربراہ بھی منعقد ہوئی۔1990ء میں سابق صدر غلام اسحاق خان نے ان کی حکومت برطرف کردی لیکن 1993ء کے انتخابات میں واضح کامیابی حاصل کرنے کے بعد وہ دوبارہ وزیراعظم منتخب ہوگئیں لیکن 1996ء میں سابق صدر فاروق لغاری نے ایک مرتبہ پھر ان کی حکومت کا خاتمہ کردیا۔1997ء کے الیکشن کے بعد انہیں اپنے بچوں کے ہمراہ جلا وطنی اختیار کرنا پڑی جبکہ ان کے شوہر آصف علی زرداری کو جیل میں ڈال دیا گیا۔18 اکتوبر 2007ء کو وہ وطن واپس آئیں۔

27 دسمبر 2007 کو راولپنڈی میں جلسے کے بعد واپسی پر سابق وزیراعظم بے نظیر بھٹو خودکش حملے میں جاں بحق ہوگئیں تھیں۔