حکومت کو ایف بی آر کے لیے نئے سربراہ کی تلاش
اسلام آباد: حکومت نے فیڈرل بورڈ آف ریونیو (ایف بی آر) کے نئے چیئرمین کی تعیناتی کے لیے موزوں شخص کی تلاش کے کام کا آغاز کردیا۔
خیال رہے کہ موجودہ ایف بی آر چیئرمین ڈاکٹر محمد ارشد 30 جون کو ریٹائر ہوجائیں گے، ڈاکٹر ارشد اپنی پینشن کی عمر کو رواں سال اپریل میں پہنچ چکے تھے لیکن آئندہ مالی سال 18-2017 کے بجٹ کی تیاری کے لیے ان کے عہدے میں 30 جون تک کی توسیع دی گئی تھی۔
اس حوالے سے باخبر ذرائع نے ڈان کو بتایا کہ متعدد سینئر افسران اس عہدے کے حصول کے لیے گھبراہٹ کا شکار ہیں اور پاکستان مسلم لیگ (ن) سے اس عہدے کو حاصل کرنے کے لیے رابطے میں ہیں۔
ایف بی آر کے ایک عہدیدار نے بتایا کہ پاناما پیپرز کے دعوؤں سے متعلق سپریم کورٹ کے حکم پر وزیراعظم نواز شریف اور ان کے اہل خانہ کے اثاثوں کی تفتیش کے لیے بنائی گئی مشترکہ تحقیقاتی ٹیم (جے آئی ٹی) کے باعث اس عہدے کو مزید اہمیت حاصل ہوگئی ہے اور ’یہ عہدہ انتہائی حساس ہوگیا ہے‘۔
عہدیدار کا کہنا تھا کہ ’صرف قابل اعتماد شخص کو ہی ایف بی آر کا چیئرمین مقرر کیا جائے گا‘، حکومت کوئی بھی فیصلہ جلد بازی میں نہیں کرے گی۔
واضح رہے کہ ایف بی آر کو آئندہ مالی سال میں 4 کھرب روپے کا ریونیو جمع کرنے کا مشکل ترین ٹاسک دیا گیا ہے۔
ذرائع کا کہنا ہے کہ پاکستان کسٹم کے بی ایس-21 کے افسر شوکت علی مذکورہ عہدے کے لیے پہلے اُمیدوار ہیں، شوکت علی اس وقت ڈائریکٹریٹ آف انٹیلی جنس اینڈ انویسٹی گیشن کے ڈائریکٹر جنرل کے عہدے پر تعینات ہیں۔
اس کے علاوہ ان لینڈ ریونیو سروس (آئی آر ایس) کے افسر خواجہ تنویر بھی اس عہدے کے اُمیدواروں میں شامل ہیں۔
اس کے علاوہ اس اہم عہدے کو حاصل کرنے کے لیے آئی آر ایس کے رکن رحمت اللہ وزیر بھی کوششوں میں مصروف ہیں۔
ذرائع کے مطابق ان کے علاوہ اکنامک افیئرز ڈویژن کے موجودہ سیکریٹری طارق پاشا بھی ایف بی آر کے چیئرمین اور فنانس سیکریٹری کے عہدوں کے لیے مضبوط اُمیدوار ہیں۔
ذرائع کا کہنا تھا کہ ’اگر حکومت فنانس سیکریٹری کے عہدے پر کسی اور افسر کو تعینات کردیتی ہے تو طارق پاشا کو ایف بی آر کے چیئرمین کے عہدہ پر تعینات کیا جاسکتا ہے‘۔
یاد رہے کہ طارق پاشا اور وفاقی وزیر خزانہ اسحاق ڈار کے درمیان کام کے حوالے سے اچھے تعلقات قائم ہیں۔
ذرائع نے بتایا کہ کسٹمز اور آئی آر ایس میں بی پی ایس-22 کے عہدوں پر متعدد افسران موجود ہیں، لیکن انہیں پہلے ہی سائڈ لائن کردیا گیا ہے، ’آپ کو مذکورہ عہدے کے حصول کے لیے درست رابطے کی ضرورت ہے‘۔
اس حوالے سے پاکستان ایڈمنسٹریٹو سروس (پی اے ایس) سے تعلق رکھنے والے کچھ افسران نے اعلیٰ حکام سے رابطہ کیا ہے، جس کے بعد اندازہ لگایا جارہا ہے آئندہ ہفتے کچھ نئے نام بھی سامنے آسکتے ہیں۔
ذرائع کا کہنا تھا کہ ’ایف بی آر کے چیئرمین کی تعیناتی وزیر خزانہ کی صوابدید پر ہے‘، ذرائع کا مزید کہنا تھا کہ دو سینئر حکومتی افسران نے ایف بی آر کے مذکورہ عہدے کے لیے اعلیٰ حکام سے رابطہ کیا ہے۔
ذرائع نے بتایا کہ لاہور سے تعلق رکھنے والے بہت سے وفاقی سیکریٹریز ایف بی آر کے چیئرمین کے عہدے کے حصول کی دوڑ میں شامل ہیں۔
یہ رپورٹ 25 جون 2017 کو ڈان اخبار میں شائع ہوئی
لائیو ٹی وی