اسلام آباد: نجی ایئر لائن کا لفٹر گرگیا، خواتین سمیت 5 افراد زخمی
اسلام آباد: وفاقی دارالحکومت میں بینظیر انٹر نیشنل ائیر پورٹ پر لفٹر گرنے سے تین خواتین سمیت چار مسافر اور ایک لوڈر شدید زخمی ہو گیا۔
بینظیر انٹرنیشنل ایئرپورٹ پر نجی ایئرلائن کی پرواز اے کے 615 اسلام آباد سے دبئی روانگی کے لیے تیار تھی اور مسافر طیارے میں سوار ہونے کے لیے جارہے تھے کہ اس دوران مسافروں کو طیارے میں لے جانے والا لفٹر گر گیا۔
لفٹر گرنے سے تین خواتین سمیت چار مسافر شدید زخمی ہوئے جبکہ ان کے ساتھ ایک لوڈر بھی زخمی ہوا جنہیں طبی امداد کے لیے فور طور پر شہر میں قریبی ہسپتال منتقل کیا گیا۔
مزید پڑھیں: بینظیرانٹرنیشنل ایئرپورٹ: مسافر طیارہ رن وے سے نیچے آگیا
زخمی ہونے والوں میں مسافر محمد لطیف، کلثوم بیگم، بلقیس اختر، رفیقہ بی بی اور لوڈر قمر شامل ہیں۔
گرنے والے لفٹر کو بھی کرین کی مدد سے موقع سے ہٹایا گیا جبکہ پرواز بھی تاخیر کا شکار ہوگئی جو اب دن ایک بجے اپنی اڑان بھرے گی۔
لفٹر گرنے سے طیارے کا دایاں پَر بھی متاثر ہوا جبکہ اسے یہاں سے منتقل کر دیا گیا۔
بینظیر انٹرنیشل ایئرپورٹ کے حکام کا کہنا ہے کہ متاثرہ غیر ملکی ایئرلائن کے طیارے کو اسلام آباد سے دبئی جانا تھا۔
لائیو ٹی وی