نواز شریف نے عوام سے کیے گئے وعدوں کو پورا کیا، وزیر اعظم
وزیر اعظم شاہد خاقان عباسی نے کہا ہے کہ نواز شریف نے عوام سے جو وعدے کیے تھے وہ پورے کیے گئے ہیں اور اگر کوئی وعدہ مکمل ہونے سے رہ گیا ہے تو وہ بھی پورا کردیا جائے گا۔
کہوٹہ میں عوامی اجتماع سے خطاب کرتے ہوئے عوام کے لیے جو منصوبے پورے کیے وہ احسان نہیں کیا بلکہ یہ ان کا حق تھا، جسے عوام تک پہنچانے کی کوشش کی ہے۔
ان کا کہنا تھا کہ عوام کی طاقت سے پاکستان میں مسلم لیگ (ن) کی حکومت آئی اور امید ہے کہ آئندہ انتخابات میں بھی ہماری حکومت آئے گی۔
مزید پڑھیں: جمہوریت پر شب خون مارنے والوں کو ناکامی ہوگی، شاہد خاقان عباسی
انہوں نے کہا کہ کہوٹہ میرا گھر ہے اور یہاں کے لوگوں کی محبت میری زندگی کا اثاثہ ہے اور بطور وزیر اعظم پہلی بار اپنے حلقے میں آیا ہوں اور اس حلقے میں (ن) لیگ کی حکومت کی طرف سے کام کیے گئے۔
انہوں نے کہا کہ جب بھی پاکستان کے عوام نے بہتر فیصلے کیے اس کے اثرات پہنچے اور جو منصوبے 50 سال سے شروع نہیں ہوئے تھے وہ ہماری حکومت نے پورے کیے اور ملکی معیشت کو مضبوط کیا۔
وزیر اعظم کا کہنا تھا کہ ہم نے نامساعد حالات کے باوجود کوئی سمجھوتہ کیے بغیر ملکی معیشت کو مضبوط کیا ہے اور یہ سب اس حکومت کا فرض تھا۔
بجلی و گیس کی کمی کے حوالے سے بات کرتے ہوئے ان کا کہنا تھا کہ مسلم لیگ (ن) کی حکومت نے ملک میں بجلی اور گیس کی قلت کو ختم کردیا ہے۔
ان کا کہنا تھا کہ نواز شریف کے خلاف جو فیصلہ آیا اس سے کوئی اتفاق نہیں کرتا لیکن پھر بھی اسے قبول کیا گیا اور اگر عوام کا ساتھ رہا تو آئندہ انتخابات میں بھی حکومت (ن) لیگ کی آئے گی۔
شاہد خاقان عباسی نے کہا کہ کہوٹہ میں جو بھی کام نظر آرہے ہیں وہ ہماری حکومت نے کرائے ہیں اور اس علاقے میں عوام کو ہر سہولیات فراہم کی جائے گی۔
یہ بھی پڑھیں: ہمارے وزیراعظم نواز شریف ہی ہیں، شاہد خاقان عباسی
اس موقع پر وزیر اعظم شاہد خاقان عباسی نے کہوٹہ کے عوام کے لیے ایک معیاری یونیورسٹی کے قیام کا اعلان کیا ساتھ ہی انہوں نے نوجوانوں کو خوشخبری دیتے ہوئے کہا کہ ان کے لیے کھیلوں کا اسٹیدیم بھی تعمیر کیا جائے گا۔
انہوں نے کہا کہ کہوٹہ میں موجود ہسپتال کو جدید طریقوں سے استوار کیا جائے گا جبکہ اسکولوں کو ہائر سیکینڈری اسکول کا درجہ دیا جائے گا۔
لائیو ٹی وی