نیوزی لینڈ نے باؤلرز خصوصاً اعجاز پٹیل کی عمدہ باؤلنگ کی بدولت پاکستان کو پہلے ٹیسٹ میچ میں سنسنی خیز مقابلے کے بعد 4رنز سے شکست دے کر سیریز میں میں 0-1 کی برتری حاصل کر لی۔

ابوظہبی میں کھیلے گئے ٹیسٹ میچ میں 176رنز کے ہدف کے تعاقب میں اوپنرز نے قومی ٹیم کو 40رنز کا اچھا آغاز فراہم کیا لیکن پھر ٹیم 48رنز تک پہنچتے پہنچتے تین وکٹیں گفنوا چکی تھی۔

ٹیم کی سب سے تجربہ کار جوڑی اسد شفیق اور اظہر علی نے 82رنز کی شراکت قائم کر کے پاکستان کو فتح کے قریب پہنچا دیا لیکن اس کے بعد وکٹیں گرنے کا ایسا سلسلہ شروع ہوا جو تھم نہ سکا اور پوری ٹیم 171رنز پر ڈھیر ہو گئی۔

پہلا میچ کھیلنے والے اعجاز پٹیل کو دوسری اننگز میں پانچ وکٹوں سمیت میچ میں 7 کھلاڑیوں کو نشانہ بنانے پر میچ کا بہترین کھلاڑی قرار دیا گیا۔