بھارت میں 17ویں لوک سبھا کے لیے انتخابات کا آغاز 11 اپریل سے ہورہا ہے جس کے لیے تمام سیاسی جماعتوں کی تیاریاں زور و شور سے جاری ہیں۔

تقریبا 6 ہفتوں تک رہنے والے لوک سبھا یعنی ایوان زیریں کے انتخابات 7 مراحل میں 19 مئی تک جاری رہیں گے، جن کے نتائج کا اعلان 23 مئی کا کیا جائے گا۔

رواں برس بھارت میں تقریبا 90 کروڑ افراد اپنا حق رائی دہی استعمال کریں گے جن میں 13 کروڑ نئے ووٹرز بھی پہلی بار ووٹ دیں گے۔

عام انتخابات کے لیے سیاسی جماعتوں کی مہم جاری ہے اور اس کے ساتھ ہی مخالف جماعتوں پر تنقید کرنے کا سلسلہ بھی عروج پر ہے۔

بھارتی وزیراعظم نریندر مودی دوسری مدت کے لیے انتخابات میں حصہ لے رہے ہیں جبکہ اپوزیشن جماعت کانگریس کے سربراہ راہول گاندھی اتر پردیش کے حلقے امیٹھی سے انتخاب لڑیں گے۔

کانگریس نے یہ اعلان بھی کیا ہے کہ راہول گاندھی کیرالہ میں لوک سبھا کے حلقے وایاناڈ سے بھی انتخابات میں حصہ لیں گے۔

کانگریس کی اتر پردیش کی جنرل سیکریٹری اور راہول گاندھی کی ہمشیرہ پریانکا گاندھی نے رواں برس کے آغاز میں عملی سیاست میں قدم رکھا ہے۔

پریانکا گاندھی نے چند روز قبل بھارتی وزیراعظم نریندر مودی کے خلاف انتخاب لڑنے کا عندیہ دیا تھا۔