دنیا بھر کے سکھوں کو کرتارپور راہداری کے افتتاح کا بے صبری سے انتظار ہے جس کے ذریعے بھارت سے سکھ یاتری پاکستان میں اپنے مقدس مقامات میں سے ایک کی زیارت کے لیے آسکیں گے۔

کرتارپور راہداری کا افتتاح ہفتہ کو سکھ مذہب کے بانی بابا گرونانک کے 550ویں جنم دن سے چند روز قبل جائے گا اور وزیر اعظم عمران خان بھارت سے آنے والے سکھ یاتریوں کے پہلے گروپ کا استقبال کریں گے۔

کرتارپور مزار کے نگہبان رامَش سنگھ اروڑا نے غیر ملکی خبر رساں ایجنسی 'اے ایف پی' کو بتایا کہ وہ بہت پرجوش ہیں اور امید ظاہر کی کہ اس اقدام سے مستقبل میں پاکستان میں سکھوں کے دیگر مقدس مقامات تک اسی طرح رسائی کے دروازے کھلیں گے۔

انہوں نے کہا کہ اگر تاریخ کا مطالعہ کیا جائے تو سکھ مذہب کی بنیاد پاکستان سے ہی جُڑی ہے۔

پاکستان نے انتہائی تیزی سے راہداری کی تعمیر کا کام مکمل کیا اور گوردوارہ ڈیرہ صاحب آنے والے سکھ یاتریوں کے لیے دیگر سہولیات کا انتظام بھی کیا گیا ہے۔