صحت غذ١ کاروبار موبائل فون‎حیرت انگیز غزہ المیہ

فنٹیسی اور سائنس فکشن فلموں کے شائقین کے لیے خوشخبری ہے کہ ہولی وڈ کے مایہ ناز فلم ساز جیمز کیمرون نے ایک دہائی قبل ریلیز کی گئی اپنی شہرہ آفاق فلم ’اوتار‘ کے پہلے سیکوئل کی نصف شوٹنگ مکمل کرلی۔

جیمز کیمرون گزشتہ ایک سال سے زائد عرصے سے فلم کی شوٹنگ میں مصروف ہیں اور گزشتہ برس اپریل میں انہوں نے اس بات کی تصدیق کی تھی کہ وہ ’اوتار‘ کا سیکوئل بنائیں گے۔

رواں برس اپریل میں یہ خبر سامنے آئی تھی کہ ایکشن ہیر ون ڈیزل بھی ’اوتار‘ کے سیکوئل میں ایکشن میں دکھائی دیں گے۔ یہ پہلا موقع ہوگا کہ ون ڈیزل اور جیمز کیمرون ایک ساتھ کام کرتے دکھائی دیں گے۔

جیمز کیمرون کی جانب سے ’اوتار‘ کے بنائے آفیشل ٹوئٹر ہینڈل پر بتایا گیا کہ شہرہ آفاق فلم کے سیکوئل کی 2019 کی شوٹنگ مکمل کرلی گئی اور اب نئے سال میں فلم کی شوٹنگ کا آغاز کیا جائے گا۔

اگرچہ ٹیم نے واضح نہیں کیا کہ فلم کی کتنی شوٹنگ مکمل ہوئی ہے، تاہم خیال کیا جا رہا ہے کہ فلم کی نصف سے زائد شوٹنگ کو مکمل کرلیا گیا۔

یہ بھی پڑھیں: شہرہ آفاق فلم ’اوتار‘ کی نئی سیریز بنے گی

ٹوئٹ کے ذریعے فلم کی ٹیم نے شوٹنگ کے دوران لی گئی ایک تصویر شیئر کرتے ہوئے لکھا کہ مذکورہ سین فلم کی 2019 کی شوٹنگ کا آخری دن ہے۔

ٹوئٹر پر شیئر کی گئی تصویر سے اندازہ ہوتا ہے کہ سال 2019 میں فلم کا آخری سین سمندر میں شوٹ کیا گیا ہوگا۔

مزید پڑھین: ایکشن ہیرو ون ڈیزل شہرہ آفاق فلم ’اوتار‘ کا حصہ

اس بات کا بھی اعلان نہیں کیا گیا کہ فلم کو کب تک ریلیز کیا جائے گا اور اس کا پہلا ٹریلر کب تک سامنے آئے گا، اس سے قبل خبریں تھیں کہ ’اوتار‘ کے پہلے سیکوئل کو دسمبر 2020 تک ریلیز کیا جائے گا۔

سیکوئل فلم میں ون ڈیزل بھی ایکشن میں دکھائی دیں گے—فوٹو: کامک بک

سیکوئل فلم میں ون ڈیزل کے علاوہ کیٹ ونسلیٹ، سیم ورتھنگٹن، زوئے سالڈانا اور اسٹیفن لانگ سمیت دیگر اداکار ایکشن میں دکھائی دیں گے۔

خیال رہے کہ جیمز کیمرون کی شہرہ آفاق سائنس فکشن فلم ’اوتار‘ 2009 میں ریلیز ہوئی تھی، فلم ساز نے اپریل 2018 میں ’اوتار‘ کے سیکوئل بنانے اور اسے ٹرائلوجی کی طرح بنانے کا اعلان کیا تھا۔

یہ بھی پڑھیں: ’اوتار‘آپ کے سن پیدائش کی سب سے ہٹ فلم؟

جیمز کیمرون نے اعلان کیا تھا کہ’اوتار‘ کو ٹرائلوجی کی طرح بنایا جائے گا، جس کے لیے ہر ٹرائلوجی میں 3 سے 4 فلمیں ہوں گی۔