پاکستان سپرلیگ (پی ایس ایل) 2020 کے ایک اور سنسنی خیز مقابلے میں لاہور قلندرز نے بین ڈنک کی یاردگار اننگز کی بدولت کراچی کنگز کو 8 وکٹوں سے شکست دی جبکہ ملتان سلطانز نے اسلام آباد یونائیٹڈ کو 9 وکٹوں سے ہرا دیا۔

راولپنڈی کرکٹ اسٹیڈیم میں بارش کے باعث میچ متاثر ہوا اور مختصر اننگز میں اسلام آباد یونائیٹڈ نے مقررہ 9 اوورز میں 7 وکٹوں پر 91 رنز بنائے جس کو ملتان سلطانز نے ایک وکٹ کے نقصان پر ساتویں اوور میں حاصل کیا۔

ملتان کی جانب سے 61 رنز بنانے والے جیمز وینس کو میچ کا بہترین کھلاڑی قرار دیا گیا۔

لاہور میں پی ایس ایل کا ایک بہترین میچ کھیلا گیا جہاں قلندرز کے بین ڈنک نے چھکوں اور چوکوں کی بارش کی اور اپنی ٹیم کو تیسری کامیابی دلائی۔

کراچی کنگز نے پہلے کھیلتے ہوئے 5 وکٹوں پر 187 رنز بنائے تھے جس میں الیکس ہیلز کے آؤٹ ہوئے بغیر 80 رنز بھی شامل تھے۔

لاہور قلندرز نے کپتان سہیل اختر اور ڈنک کی جارحانہ اننگز کی بدولت مطلوبہ ہدف آخری اوور کی پہلی گیند پر 2 وکٹیں کھو کر حاصل کیں اور ڈنک کو میچ کا بہترین کھلاڑی قرار دیا گیا۔