لاہور: انسٹا گرام کے ذریعے بم بنانے کا طریقہ سیکھنے والے مجرم کو ڈھائی سال قید
لاہور میں انسدادِ دہشت گردی کی خصوصی عدالت نے سوشل میڈیا کے ذریعے بم بنانے کا طریقہ سیکھنے والے مجرم کو ڈھائی سال قید اور 50 ہزار روپے جرمانے کی سزا سنادی۔
ڈان نیوز کے مطابق انسداد دہشتگردی کی خصوصی عدالت نے حنان عبداللہ نامی مجرم کو انسٹا گرام کے ذریعے بم بنانے کا طریقہ سیکھنے کے مقدمے میں سزا سنائی، فیصلے میں کہا گیا ہے کہ مجرم حنان ضمانت پر ہے، اسے گرفتار کرکے کوٹ لکھپت جیل منتقل کیا جائے۔
عدالت نے ٹرائل مکمل ہونے پر مقدمے کا فیصلہ سنایا۔
وفاقی تحقیقاتی ادارے (ایف آئی اے) کے مطابق مجرم غیر ملکی انسٹاگرام اکاؤنٹ سے بم بنانے سے متعلق معلومات لے رہا تھا، امریکا کی فیڈرل بیورو آف انویسٹی گیشن (ایف بی آئی) نے معاملے سے پاکستانی حکومت کو آگاہ کیا تھا۔
حکومت پاکستان نے ایف آئی اے کو معاملے کی مکمل چھان بین کی ہدایت کی، ایف آئی اے کی جانب سے دوران ٹرائل 8 گواہ عدالت میں پیش کیے گئے۔
عدالت نے اپنے فیصلے میں قرار دیا کہ مجرم حنان عبداللہ پر بم بنانے کا طریقہ سیکھنے کا الزام ثابت ہوتا ہے، پراسیکیوشن اس الزام کے علاوہ باقی کوئی الزام ثابت نہیں کر سکی، مجرم حنان عبداللہ کو انسٹاگرام کے زریعے بم بنانے کا طریقہ سیکھنے پر ڈھائی سال قید کی سزا سنائی جاتی ہے۔
عدالت نے اپنے فیصلے میں قرار دیا کہ اس جرم کی زیادہ سے زیادہ سزا 10 سال ہے، عدالت کی نظر میں حالات اور مجرم کی عمر دیکھتے ہوئے عدالت ڈھائی سال قید کی سزا سناتی ہے۔
انسداد دہشتگردی کی خصوصی عدالت نے حکام کو ہدایت کی کہ مجرم حنان عبداللہ ضمانت پر ہے، حراست میں لیکر کوٹ لکھپت جیل منتقل کیا جائے۔
لائیو ٹی وی