ملک بھر میں سونا ہزاروں روپے مہنگا ہو گیا
مسلسل دو روز سے جاری کمی کے بعد آج ملک بھر میں سونا ہزاروں روپے مہنگا ہو گیا۔
سرکاری خبر رساں ادارے ’اے پی پی‘ کے مطابق آل پاکستان صرافہ جیمز اینڈ جیولرز ایسوسی ایشن نے رپورٹ کیا کہ 24 قیراط کے حامل فی تولہ خالص سونے کی قیمت 5 ہزار 900 روپے اضافے سے 3 لاکھ 53 ہزار 100 روپے ہو گئی۔
اسی طرح 24 قیراط 10 گرام سونا 5 ہزار 58 روپے مہنگا ہو کر 3 لاکھ 2 ہزار 726 روپے میں فروخت ہوا جبکہ 22 قیراط 10 گرام سونے کی قیمت 4 ہزار 636 روپے بڑھ کر 2 لاکھ 77 ہزار 508 روپے ہو گئی۔
ادھر، فی تولہ اور 10 گرام چاندی کی قیمت بالترتیب 3 ہزار 456 روپے اور 2 ہزار 962 روپے پر برقرار رہی۔
ایسوسی ایشن نے رپورٹ کیا کہ عالمی منڈی میں فی اونس سونا 59 ڈالر مہنگا ہو کر 3 ہزار 347 ڈالر میں فروخت ہوا۔
واضح رہے کہ 31 مئی (ہفتہ) کو 24 قیراط کے حامل فی تولہ خالص سونے کا بھاؤ ایک ہزار 400 روپے گر کر 3 لاکھ 47 ہزار 200 روپے ہو گیا تھا۔
اسی طرح 24 قیراط 10 گرام سونا ایک ہزار 200 روپے تنزلی سے 2 لاکھ 97 ہزار 668 روپے میں فروخت ہوا تھا، جبکہ 22 قیراط 10 گرام سونے کی قیمت ایک ہزار ایک سو روپے کمی سے 2 لاکھ 72 ہزار 872 روپے ریکارڈ کی گئی تھی۔
30 مئی کو 24 قیراط سونے کی فی تولہ قیمت میں 700 روپے کمی کے بعد فی تولہ سونا 3 لاکھ 48 ہزار 600 روپے کا ہوگیا تھا۔
لائیو ٹی وی