لاہور سمیت پنجاب کے کئی شہروں میں زلزلے کے جھٹکے، شدت 4.4 ریکارڈ
پنجاب کے دارالحکومت لاہور کے علاوہ قصور، اوکاڑہ، ننکانہ، شیخوپورہ سمیت دیگر شہروں میں زلزلے کے جھٹکے محسوس کیے گئے ہیں، زلزلے کی شدت 4.4 ریکارڈ کی گئی، لوگ کلمہ طیبہ کا ورد کرتے ہوئے گھروں سے نکل آئے۔
ڈان نیوز کے مطابق لاہور کے مختلف علاقوں میں زلزلے کے جھٹکے محسوس کیے گئے، زلزلے کی شدت 4.4 ریکارڈ کی گئی، زلزلے کی گہرائی 14 کلومیٹر اور مرکز جنوب مغرب لاہور تھا۔
لاہور میں 11 بج کر 39 منٹ پر زلزلے کے شدید جھٹکے محسوس کیے گئے، اس کے علاوہ پنجاب کے دیگر اضلاع قصور، اوکاڑہ، مریدکے، کامونکی اور شیخوپورہ میں بھی زلزلے کے جھٹکے محسوس کیے گئے ہیں۔
شہری دفاتر اور گھروں سے کلمہ طیمہ کا ورد کرتے ہوئے باہر نکل آئے، زلزلے کی گہرائی 14 کلو میٹر اور مرکز جنوب مغرب لاہور تھا۔
ڈائریکٹر جنرل پراونشل ڈیزاسٹر مینجمنٹ اتھارٹی (پی ڈی ایم اے) نے کہا کہ پنجاب بھر کی انتظامیہ عمارتوں کی چیکنگ میں مصروف ہے، زلزلہ کے آفٹر شاکس سے نمٹنے کے لیے مشینری اور عملے کو الرٹ رکھا گیا ہے۔
یاد رہے کہ حالیہ چند ہفتوں میں کراچی میں زلزلے کے جھٹکے تواتر کے ساتھ محسوس کیے گئے ہیں، اس کے علاوہ خیبرپختونخوا، بلوچستان میں بھی وقفے وقفے کے ساتھ زلزلے کے جھٹکے محسوس کیے جاتے رہے ہیں۔
پنجاب میں زلزلوں کے جھٹکے نسبتاً کم محسوس کیے گئے، تاہم زلزلوں کے جھٹکے کا تازہ سلسلہ صوبے کے کئی شہروں تک پہنچا ہے۔
لائیو ٹی وی