گٹکا، ماوا کھانے کےعادی سندھ پولیس کے افسران و اہلکاروں کیخلاف سخت ایکشن لینے کا فیصلہ
گٹکا اور ماوا کھانے والے سندھ پولیس کے افسران اور اہلکاروں کی شامت آگئی، آئی جی سندھ نے اہلکاروں کے خلاف سخت ایکشن لینے کا فیصلہ کر لیا۔
ڈان نیوز کے مطابق آئی جی سندھ غلام نبی میمن کے احکامات پر جاری نوٹیفکیشن کے مطابق گٹکے کے عادی افسران و اہلکاروں کی فہرست تیار کرنے کا حکم دیا گیا ہے، نوٹیفکیشن میں کہا گیا ہے کہ پولیس اہلکاروں کو گٹکا، ماوا چھوڑنے کےلیے 10 روز کی مہلت دی گئی ہے، جس کے بعد ایکشن لیا جائے گا۔
اعلامیے میں کہا گیا کہ گٹکا کھانے سے صحت کے ساتھ ساتھ پولیس کی ساکھ بھی متاثر ہوتی ہے، گٹکا کھانا ترک نہ کرنے والے افسران و اہلکاروں کے خلاف محکمانہ کارروائی بھی کی جائے گی۔
نوٹیفیکشن کے مطابق غیر سنجیدگی دکھانے پر متعلہ افسر و اہلکار کی ملازمت سے برخاستگی بھی ہو سکتی ہے۔ سندھ پولیس کے مطابق صوبے کے تمام اضلاع سے گٹکا کھانے والے پولیس اہلکاروں کی رپورٹ طلب کرلی گئی ہے۔
لائیو ٹی وی