وادی تیراہ میں فائرنگ کے واقعے کی انکوائری ہو رہی ہے، گورنر خیبرپختونخوا
گورنر خیبر پختونخوا (کے پی) فیصل کریم کنڈی نے کہا ہے کہ وادی تیراہ میں فائرنگ کے واقعے کی انکوائری ہو رہی ہے، وزیراعلیٰ کے پی کو چاہیے کے دیگر جگہوں کے شہدا کے لیے بھی مالی امداد کا اعلان کریں۔
ڈان نیوز کے مطابق گورنر کے پی نے گورنر ہاؤس پشاور میں میڈیا سے گفتگو کے دوران کہا کہ پاکستان تحریک انصاف (پی ٹی آئی) پہلے آپس کے اختلافات ختم کرے، پھر احتجاج کرے، جب صوبے کا وزیراعلیٰ بھتہ دیتا ہو تو باقی صوبے کا اللہ ہی حافظ ہے، پی ٹی آئی اب گلی کوچوں تک محدود ہوگئی ہے۔
گورنر فیصل کریم کنڈی نے کہا کہ پی ٹی آئی پہلے صوبے کے وسائل پر احتجاج کرتی تھی، میں نے آل پارٹیز کانفرنس (اے پی سی) بلائی تھی، جس میں سب آئے تھے، صرف تحریک انتشار موجود نہیں تھی۔
انہوں نے کہا کہ جب ایک صوبے کا وزیراعلیٰ بھتہ دیتا ہو تو باقی صوبے کا اللہ ہی حافظ ہے، ان کا کام صرف لوٹ مار کرنا ہے۔
یاد رہے کہ آج خیبر پختونخوا حکومت نے تیراہ واقعے پر افسوس کا اظہار کرتے ہوئے جاں بحق افراد کے لواحقین کے لیے ایک کروڑ روپے جبکہ زخمیوں کے لیے 25 لاکھ روپے مالی امداد کا اعلان کیا تھا۔
وزیر اعلیٰ کے مشیر اطلاعات بیرسٹر ڈاکٹر سیف کے بیان میں کہا گیا تھا کہ وزیر اعلیٰ علی امین گنڈاپور خود واقعے کی نگرانی کر رہے ہیں اور مسلسل متعلقہ انتظامیہ سے رابطے میں ہیں۔
بیرسٹر ڈاکٹر سیف کے مطابق وزیراعلیٰ نے قبائلی عمائدین کا جرگہ پشاور طلب کیا ہے، جس میں عمائدین کے تحفظات سنے جائیں گے، انہوں نے کہا کہ خیبر پختونخوا حکومت واقعے پر نہایت افسردہ ہے اور متاثرہ خاندانوں کے ساتھ غم کی اس گھڑی میں مکمل یکجہتی کا اظہار کرتی ہے۔
لائیو ٹی وی