احسن اقبال کی چین کے نائب وزیر خارجہ سے ملاقات، دوطرفہ تعلقات کو مزید مستحکم بنانےکا عزم
وفاقی وزیرِ منصوبہ بندی ترقی و خصوصی اقدامات احسن اقبال نے چین کے نائب وزیر خارجہ سن ویڈونگ سے ملاقات ہے۔
ڈان نیوز کے مطابق وزیر منصوبہ بندی احسن اقبال کی دورہِ چین میں اعلیٰ حکام کے ساتھ ملاقاتوں کا سلسلہ جاری ہے، چین کے نائب وزیر خارجہ سن ویڈونگ سے ملاقات میں باہمی دلچسپی، سی پیک فیز 2 کے تحت صنعتی اور بزنس ٹو بزنس تعاون پر بات چیت کی۔
دورانِ ملاقات دونوں وزراء نے دو طرفہ تعلقات کو مزید مستحکم بنانے کے عزم کا اظہار کیا، اس موقع پر وزیر منصوبہ بندی نےکہا کہ پاکستانی عوام چین کی قیادت اور عوام کی لازوال دوستی پر ناز کرتے ہیں، سن ویڈونگ کے پاکستان میں زمانہ سفارت کاری کے دوران ہم نے سی پیک کا سفر کاغذ سے اربوں ڈالر کے منصوبوں تک پہنچایا۔
احسن اقبال نے مزید کہا کہ پاک-چین دوستی بدلتے حالات اور ہر دور میں نئی توانائی کے ساتھ مضبوط تر ہوتی جا رہی ہے، حالیہ علاقائی کشیدگی میں چین نے پاکستان کی غیر مشروط حمایت جاری رکھی۔
وفاقی وزیر منصوبہ کا کہنا تھا کہ چین کی ترقی کا ماڈل ہمارے لیے مشعل راہ ہے، پاکستان چین کے تجربات سے مستفید ہو کر برآمدات اور ٹیکنالوجی کی بنیاد پر معیشت کی تشکیل کی جانب گامزن ہے۔
انہوں نے کہا کہ اُڑان پاکستان کا 5 ایز فریم ورک سی پیک فیز 2 کے وژن سے ہم آہنگ ہے، اُڑان پاکستان کا مرکزی مقصد عوام دوست اصلاحات کے ذریعے معاشی، سماجی اور معاشرتی استحکام کو یقینی بنانا ہے، سی پیک فیز 2 میں صنعتی و تکنیکی شعبے اہم ہوں گے۔
احسن اقبال نے کہا کہ چین کی قیادت عالمی امن کے لیے مثالی کردار ادا کر رہی ہے، ہماری ترجیح ایک باصلاحیت، تعلیم یافتہ اور ہنر مند افرادی قوت کی تیاری ہے، بزنس ٹو بزنس تعاون سے سی پیک کا دائرہ وسیع ہوگا۔
اس موقع پر چین کے نائب وزیر خارجہ سن ویڈونگ نے کہا کہ چین مختلف شعبوں میں پاکستان کے ساتھ تعاون کو فروغ دینے کے لیے پرعزم ہے۔
انہوں نے مزید کہا کہ پاکستان کے 5 ایز فریم ورک سے معاشی استحکام اورخود انحصاری کے امکانات روشن ہیں، سی پیک منصوبوں میں قائدانہ اور کلیدی کردار پر چین میں احسن اقبال کو قدر کی نگاہ سے دیکھا جاتا ہے۔
لائیو ٹی وی