پاکستانی کوہ پیماؤں نے پہلی مرتبہ ہندوکش کی بلند ترین چوٹی تریچ میر سر کرلی
گلگت بلتستان سے تعلق رکھنے والے کوہ پیماؤں سرباز اور عابد بیگ چوٹی سر کرنے والے پہلے پاکستانی کوہ پیما بن گئے جب کہ دیگر کوہ پیما سخت موسمی صورتحال کے باعث 7ہزار300 میٹر بلندی تک محدود رہے۔
وزیراعلیٰ علی امین گنڈ اپورکی خصوصی ہدایات پر خیبرپختونخوا کلچراینڈٹورازم اتھارٹی کے زیراہتمام ہندوکش پہاڑی سلسلہ کی بلند ترین چوٹی تریچ میر پاکستانی کوہ پیماؤں نے سر کرلی۔
ڈائریکٹر ایڈمن اینڈ فنانس خیبرپختونخوا کلچراینڈ ٹورازم اتھارٹی عمر ارشد خان کی زیرقیادت جانے والے پاکستانی کوہ پیماؤں کی ٹیم میں گلگت بلتستان سے تعلق رکھنے والے دو کوہ پیما سرباز خان اور عابد بیگ 7 ہزار 708 میٹر بلند ترین چوٹی سر کرنے میں کامیاب ہوئے۔
تاہم، سخت موسمی صورتحال اور برفانی طوفان کے باعث دیگر 5 کوہ پیما 7 ہزار300 میٹر کی بلندی تک محدود رہے جب کہ 7 کوہ پیماؤں نے 7 ہزار میٹر کا فاصلہ سر کرنے کا اعزاز اپنے نام کرلیا۔
کوہ پیماؤں میں سرباز خان، عابد بیگ، عمر ارشد خان، ڈاکٹر نوید اقبال، میجر محمد عاطف، شمس القمراور اکمل نوید شامل تھے جب کہ ان کے ہمراہ انتہائی بلندی پر سپورٹ فراہم کرنے والے (ہائی ایلٹی چیوڈ) پورٹرز حسن، شہزاد، یونس اور عارف شامل تھے، جن کا 8 ہزار میٹر کی بلندی کا وسیع تجربہ ہے۔
ڈائریکٹر ایڈمن اینڈ فنانس خیبرپختونخوا کلچراینڈٹورازم اتھارٹی عمر ارشد خان نے گفتگو کرتے ہوئے کہاکہ آج تاریخ رقم ہوئی ہے اور تریچ میر چوٹی سر کرنے کے بعد دنیا سے لوگ اب خیبرپختونخوا اور چترال وادی کا رخ کرینگے۔
یاد رہے کہ تریچ میر چوٹی ہندوکش پہاڑی سلسلہ کی بلند ترین چوٹی ہے۔
ان کا کہنا تھا کہ ایک سمٹ پر دنیا میں لوگ لاکھوں ڈالر کما رہے ہیں اب یہاں چترال کے بچے ہائی ایلٹی چیوڈ پورٹرز جب بن کے ابھریں گے تو یہ آمدن یہاں کی معیشت میں اہم کردار ادا کریگی۔
تریچ میر چوٹی سر کرنے والے کوہ پیما سرباز خان نے گفتگو کرتے ہوئے کہاکہ تین بلند ترین پہاڑی سلسلہ ہندوکش، قراقرم اور ہمالیہ کی بلند ترین چوٹیاں (تین سمٹ)کے نام سے اب دنیا میں جانی جائینگی اور مجھے یہ اعزاز حاصل ہے کہ تینوں بلند ترین چوٹیاں سر کی ہیں۔
ان کا کہنا تھا کہ تریچ میر چوٹی دیگر پہاڑوں کی نسبتاً کافی مشکل بھی ہے، خیبرپختونخوا حکومت اورکلچراینڈٹورازم اتھارٹی نے سمٹ کا انعقاد کرکے نہ صرف دنیا میں اس کو کوہ پیماؤں کیلئے ایک ٹارگٹ رکھا ہے بلکہ یہاں کی تریچ وادی اور یہاں کے مقامی پورٹرز اب ایڈونچر ٹورازم کی دنیا میں آگے آئینگے۔
تریچ میر سمٹ کے علاوہ 60 سے زائدمرد و خواتین ٹریکرز کے گروپ اور100 سے زائد مقامی پورٹرزاور مقامی گائیڈز بھی اس سمٹ اور ٹریکنگ کا حصہ رہے۔
خیبرپختونخوا حکومت کی کاوشوں سے سال 26-2025 تریچ میر سال منانے کیساتھ ساتھ پہلی مرتبہ سرکاری سطح پرپاکستانی کوہ پیماؤں نے چوٹی سر کی۔
لائیو ٹی وی