فیان ال غامدی۔ — فائل فوٹو

ریاض: سعودی عرب کی ایک عدالت نے اپنی پانچ سالہ بیٹی کے ریپ اور بدترین تشدد کے نتیجے میں موت کے گھاٹ اتارنے کا جرم ثابت ہونے پر ایک مذہبی شخصیت کو آٹھ سال قید جبکہ آٹھ سو کوڑوں کی سزا سنائی ہے۔

مقامی اور عالمی سطح پر شدید عوامی ردعمل کا باعث بننے والے اس مقدمے میں عدالت نے فیان ال غامدی کو اپنی سابقہ بیوی اور بچی کی ماں کو بطور خون بہا دس لاکھ ریال ادا کرنے کا بھی حکم دیا ہے۔

بچی کی ماں کے وکیل ترکی الرشید نے اے ایف پی کو بتایا کہ مدعی نے ہرجانے کے طور پر ایک کروڑ ریال کا مطالبہ کیا تھا۔

الرشید کے مطابق، اس جرم میں غامدی کی مدد کرنے والی اس کی دوسری بیوی کو عدالت نے دس مہینے قید اور ایک سو پچاس کوڑوں کی سزا سنائی۔

وکیل نے بتایا کہ غامدی 'اپنی پانچ سالہ بیٹی لاما کے ریپ اور قتل' کا مجرم ثابت ہو گیا ہے۔

خیال رہے کہ شدید زخمی لاما کو پچیس دسمبر ، دو ہزار گیارہ میں ہسپتال داخل کیا گیا تھا۔

انسانی حقوق کے کارکنوں نے بتایا کہ لاما کی کھوپڑی ، پسلیاں اور بائیاں ہاتھ ٹوٹ گیا تھا، اس کے علاوہ بچی کے جسم پر زخموں اور جلنے کے نشانات بھی تھے۔

لاما کئی مہینے ہسپتال میں علاج کے بعد انتقال کر گئی تھی۔

رواں سال کے آغاز میں انسانی حقوق کے کارکنوں نے بتایا تھا کہ غامدی سعودی حکومت کے مجاز مذہبی سکالر نہیں لیکن انہیں کئی ٹی وی چینلوں پر بطور مہمان مدعو کیا جاتا تھا۔

کارکنوں کے مطابق، غامدی نے لاما پر تشدد کے دوران تاروں اور لاٹھی استعمال کرنے کا اعتراف کر لیا تھا۔

ہسپتال میں کام کرنے والی ایک رضا کار خاتون رندا القلیب نے بتایا کہ لاما کی ریڑھ کی ہڈی ٹوٹ چکی تھی اور اسے 'ہر جگہ' ریپ کیا گیا تھا۔

بعض اطلاعات کے مطابق، غامدی کو اپنی پانچ سالہ بیٹی کے کنوارہ ہونے پر شبہ تھا جس کے بعد ہی اس نے لڑکی کو ریپ اور تشدد کا نشانہ بنایا۔

سعودی عرب کے قدامت پسند معاشرے میں ریپ اور قتل کے لیے موت کی سزا مقرر ہے لیکن قانون کے تحت اپنی اولاد کو قتل کرنے والے باپ یا پھر بیوی کو ہلاک کرنے والے شوہر کو محض پانچ سے بارہ سال قید کی سزا ملتی ہے۔