صدر اوباما کی بیٹی کیلئے رشتہ
کینیا کے ایک وکیل نے امریکی صدر باراک اوباما کی 16 سالہ بیٹی مالیہ سے شادی کی خواہش کا اظہار کردیا جس کے عوض وہ 50 گائے، 70 بھیڑیں اور 30 بکرے دینے کو تیار ہیں۔
اسکائی نیوز کی رپورٹ کے مطابق فیلیکس کپرونو نے مقامی میڈیا کو بتایا کہ وہ 2008 میں مالیہ کی محبت میں مبتلا ہوئے۔
اوباما اس وقت پہلی مرتبہ امریکی صدر بننے کی مہم میں مصروف تھے اور مالیہ اس وقت صرف دس سال کی تھیں تاہم وکیل کا کہنا ہے کہ انہوں نے تب سے کسی کو ڈیٹ نہیں کیا اور وہ مالیہ کے وفادار رہیں گے۔
کپرونو کا کہنا ہے کہ وہ مالیہ سے محبت کرتے ہیں اور ان سے پیسے کی وجہ سے شادی کرنے کے خواہشمند نہیں۔ 'لوگ شاید کہیں کہ میں پیسوں کی وجہ سے شادی کرنا چاہتا ہوں لیکن ایسا نہیں ہے۔ میری محبت حقیقی ہے۔'
رپورٹ کے مطابق کپرونو امریکی صدر سے ان کے جولائی کے دورہ کینیا کے دوران ان کی بیٹی کا ہاتھ مانگنے کا ارادہ رکھتے ہیں۔
وہ اس سلسلے میں ایک خط بھی لکھ رہے ہیں جس میں وہ صدر اوباما سے مالیہ کو دورے پر ساتھ لانے کی درخواست کریں گے۔
خیال رہے کہ کینیا وہ ملک ہے جہاں امریکی صدر کے والد پیدا ہوئے تھے۔
لائیو ٹی وی