راولپنڈی : پاک فوج نے لائن آف کنٹرول کے قریب پاکستانی حدود میں موجود ہندوستانی جاسوس طیارے کو مار گرایا ہے۔

پاک فوج کے شعبہ تعلقات عامہ آئی ایس پی آر کے مطابق جاسوس طیارے کو فوج نے لائن آف کنٹرول کے قریب بھمبر علاقے میں گرایا۔ طیارہ فضا سے پاکستانی علاقوں کی فوٹو گرافی کے لیے استعمال کیا جا رہا تھا۔

پاکستان اور ہندوستان کے درمیان گزشتہ کچھ ماہ سے سرحد پر کشیدگی ہے اور دونوں ہی ممالک کی جانب سے ایک دوسرے کی فوج پر جنگ بندی کے معائدے کی خلاف ورزی کے الزامات عائد کیے جاتے ہیں۔

گزشتہ روز بھی ہندوستانی افواج کی جانب سے پاکستانی علاقوں میں بلااشتعال فائرنگ کی گئی جس کا پاکستان رینجرز نے بھرپور جواب دیا۔

سرحد پر فائرنگ کے واقعات میں اب تک دونوں ممالک کے درجنوں افراد ہلاک ہو چکے ہیں جن میں اکثریت پاکستان میں بسنے والے افراد کی ہے۔

مئی میں پاک ہندوستان سرحد کے قریب ہندوستانی علاقے پٹھان کوٹ سے ایک کبوتر کو 'جاسوسی' کے شبہہ میں پکڑا گیا تھا۔