کراچی: رینجرز نے کراچی کے علاقے سہراب گوٹھ میں کارروائی کرتے ہوئے مبینہ دہشت گردوں کو ہلاک کردیا ہے۔

رینجرز کے ایک اعلامیے کے مطابق یہ کارروائی وکیل حسنین بخاری کے ٹارگٹ کلرز کی موجودگی کی اطلاع پر کی گئی تھی جنہیں چار مارچ 2015 کو ٹارگٹ کلنگ کا نشانہ بنایا گیا تھا۔

اعلامیے میں دعویٰ کیا گیا کہ ملزمان نے رینجرز کو دیکھتے ہی فائرنگ شروع کردی جس کے جواب میں رینجرز کی فائرنگ سے چار ملزمان ہلاک ہوئے جبکہ گولیوں کے تبادلے میں ایک رینجرز کا اہلکار بھی زخمی ہوا۔

خیال رہے کہ حسنین بخاری کو کراچی کے علاقے کورنگی میں ٹارگٹ کلرز نے فائرنگ کرکے ہلاک کردیا تھا۔

انہیں اس وقت نشانہ بنایا گیا جب وہ اپنے دفتر جانے کے لیے گھر سے نکل رہے تھے۔

فائرنگ کے نتیجے میں ایڈووکیٹ علی حسنین بخاری شدید زخمی ہوگئے، جنھیں جناح ہسپتال منتقل کیا جارہا تھا کہ وہ راستے میں ہی دم توڑ گئے۔

واضح رہے کہ علی حسنین بخاری ایم کیو ایم کے لاپتہ کارکنان کے مقدمات بھی لڑ رہے تھے۔