واپڈا کا سلمان، آصف سے معاہدے کا دفاع
لاہور: سابق ڈومیسٹک کرکٹ چیمپئن واپڈا نے سلمان بٹ اور محمد آصف کی خدمات حاصل کرنے کا دفاع کیا ہے۔
واپڈا نے 26اکتوبر سے مختلف شہروں میں کھیلے جا رہے فرسٹ کلاس ٹورنامنٹ کیلئے سلمان اور آصف کی خدمات حاصل کی ہیں۔
واپڈا کے چیئرمین ظفر محمود نے اے ایف پی کو بتایا ’ مجھے سلمان اور آصف کی دستیابی کا معلوم ہوا تو میں نے محکمہ کھیل سے ان کھلاڑیوں کے ساتھ معاہدہ کرنے کو کہا‘۔
لارڈز ٹیسٹ میں سپاٹ فکسنگ کرنے پر پانچ سال پابندی ختم ہونے کے بعد سلمان اور آصف ان دنوں پاکستان کرکٹ بورڈ کے تحت بحالی پروگرام مکمل کر رہے ہیں ۔
سپاٹ فکسنگ میں ملوث تیسرے کھلاڑی محمد عامر پہلے ہی پابندی ختم ہونے کے بعد ڈومیسٹک کرکٹ کھیل رہے ہیں۔
ظفر محمود نے بتایا کہ وہ سلمان اور آصف کو دوسرا موقع دیے جانے کے حق میں ہیں۔
’سلمان اور آصف دوسرا موقع ملنے کے مستحق ہیں کیونکہ میرے خیال میں اپنے جرم کی سزا پانے والے ان سے کہیں بہتر ہیں جنہیں غلط کاموں کی سزا نہیں ملتی‘۔
خیال رہے کہ پی سی بی نے گزشتہ مہینے تینوں کھلاڑیوں پر 28 فروری، 2016 تک بحال پروگرام ختم ہونے سے پہلے فرسٹ کلاس اور عالمی کرکٹ کھیلنے سے روک دیا ہے۔
لائیو ٹی وی