’چہرے کی پلاسٹک سرجری کا مشورہ بدترین‘
بولی وڈ میں ایک کے بعد ایک کامیاب فلمیں دینے والی اور اپنی خوبصورتی سے خبروں کی زینت بننے والی اداکارہ دپیکا پڈوکون کے مطابق ان کو کیرئیر کا سب سے بدترین مشورہ چہرے کی پلاسٹک سرجری کرانے کا دیا گیا۔
پنک ولا کے مطابق حال ہی میں ’ویمن آف ورتھ‘ نامی ایک ایونٹ میں دپیکا سے پوچھا گیا کہ انہیں اب تک کیرئیر میں سب سے بد ترین مشورہ کیا دیا گیا ہے جس کے جواب میں دپیکا کا کہنا تھا کہ کیرئیر کی شروعات سے پہلے کسی نے انہیں چہرے کی پلاسٹک سرجری کرانے کا مشورہ دیا تھا۔
فلم ’پیکو‘ اور ’رام لیلا‘ میں اپنی مضبوط اداکاری سے جانی جانے والی دپیکا نے مزید بتایا کہ ان کے کیرئیر کا بہترین مشورہ ان کے والد نے دیا تھا جو کہ اپنے کام کو خوشی سے کرتے رہنے کا تھا۔
پسند کی فلموں کے انتخاب پر دپیکا کا کہنا تھا کہ وہ کچھ اچھی رومانوی، مزاحیہ اور ایکشن فلموں میں اداکاری کرنا چاہتی ہیں۔
فلم ’اوم شانتی اوم‘ سے بولی وڈ میں اپنا کامیاب کیرئیر شروع کرنے والی اداکارہ دپیکا پڈوکون اس وقت اپنی آنے والی فلم ’تماشا‘ اور ’باجی راؤ مستانی‘ کی تشہیر میں مصروف ہیں۔
فلم ’تماشا‘ 27 نومبر جبکہ ’باجی راؤ مستانی‘ 18 دسمبر کو سنیما گھروں میں نمائش کے لیے پیش کی جائے گی۔
لائیو ٹی وی