صحت غذ١ کاروبار موبائل فون‎حیرت انگیز غزہ المیہ

مانچسٹر یونائیٹڈ یورپ کا مہنگا ترین فٹبال کلب

اسپورٹس ڈیسکاپ ڈیٹ 31 مئ 2017

یوئیفا یوروپا کپ جیتنے کے بعد مانچسٹر یونائیٹڈ کے کھلاڑی ٹرافی کے ہمراہ جشن منا رہے ہیں— فوٹو: رائٹرز

یورپی فٹبال کلب کی کاروباری قدر کو متعین کرنے والے ادارے کی ایک رپورٹ کے مطابق ’مانچسٹر یونائیٹڈ‘ اس وقت یورپ کا مہنگا ترین فٹبال کلب بن چکا ہے۔

بزنس سروس گروپ 'کے پی ایم جی' کی ایک رپورٹ کے مطابق اس فہرست میں اسپین کے مشہور و معروف فٹبال کلب ریال میڈریڈ اور بارسلونا بالترتیب دوسرے اور تیسرے نمبر پر ہیں۔

مانچسٹر یونائیٹڈ نے حال ہی میں یورپا کپ کے فائنل میں ایاکس کو 0-2 سے شکست دے کر ٹائٹل اپنے نام کیا تھا۔

ای ایس پی این کی ایک رپورٹ کے مطابق انگلش کلب کی قدر اس وقت 3 ارب یورو سے زائد ہے جبکہ اس فہرست میں دوسرے نمبر پر آنے والے کلب کی قیمت 2 ارب 89 کروڑ یورو ہے، اس کے علاوہ فہرست میں تیسرے نمبر پر موجود ٹیم بارسلونا کی قدر 2 ارب 68 کروڑ یورو ہے۔

مزید پڑھیں: دنیا کے سب سے مہنگے فٹبالر عمرہ کیلئے مکہ میں موجود

کے پی ایم جی دنیا کی چار بڑی آڈیٹنگ کمپنیوں میں سے ایک ہے، جس نے یہ اندازہ لگایا ہے کہ مانچسٹر یونائیٹڈ دنیا کا پہلا کلب ہے جس کی قدر 3 ارب یورو سے تجاوز کر گئی ہے۔

اس تحقیق کے مصنف اور کے پی ایم جی عالمی کھیلوں کے سربراہ اینڈریا سارٹوری نے کہا کہ یورپ کے سرفہرست 32 کلبوں کی مجموعی قدر سے پتا چلتا ہے کہ دنیا بھر میں فٹبال کی بحیثیت صنعت قدر میں اضافہ ہوا ہے۔

انہوں نے بتایا کہ یورپ کے 32 فٹبال کلبوں پر تحقیق ہوئی جس میں ان کے براڈ کاسٹنگ حقوق، منافع، مشہوری، ٹیم کی جیتنے کی صلاحیت اور اسٹیڈیم کی ملکیت کا جائزہ لیا گیا۔