پی ٹی آئی کا کے پی میں اتحادی جماعت سے علیحدگی کا اعلان
خیبر پختونخوا کی حکمران جماعت پاکستان تحریک انصاف (پی ٹی آئی) نے اتحادی جماعت قومی وطن پارٹی سے راہیں جدا کرنے کا اعلان کردیا ہے۔
اسلام آباد میں صوبائی وزیر علی امین گنڈا پور کے ہمراہ مشترکہ پریس کانفرنس کرتے ہوئے شاہ فرمان کا کہنا تھا کہ صوبے میں قومی وطن پارٹی کے ساتھ نیک نیتی سے اتحاد کیاگیا تھا لیکن قومی وطن پارٹی نے پاناما کے معاملے پر پی ٹی آئی کا ساتھ نہیں دیا اور دیگر کئی معاملات میں بھی سوچ میں تضاد سامنے آیا جس کے باعث پارٹی مشاورت سے اتحاد کو ختم کرنے کا فیصلہ کیا گیا.
ان کا کہنا تھا کہ قومی وطن پارٹی کے رویے پر پارٹی کارکن اور صوبے کے عوام تذبذب کا شکار تھے اس لیے صرف اقتدار کی خاطر قومی وطن پارٹی کے ساتھ اکٹھے نہیں رہ سکتے تھے.
انھوں نے کہا کہ اگر قومی وطن پارٹی پاناما کے معاملے پر پی ٹی آئی کا ساتھ دیتی تو آج یہ دن دیکھنا نہ پڑتا۔
اتحادی جماعت کے الگ ہونے سےپیدا ہونے والی صورت حال سے نمٹنے کے حوالے سے پی ٹی آئی کے صوبائی رکن اسمبلی نے کہا کہ قومی وطن پارٹی سے علیحدگی کے حوالے سے قانونی اور آئینی طریقہ کار موجود ہے جس پر وزیراعلی عمل کریں گے۔
شاہ فرمان نے کہا کہ صوبے میں کرپشن کے خاتمے کے لیے اینٹی کرپشن یونٹ سے متعلق قانون میں تین ترامیم کی گئی ہیں جبکہ صوبائی احتساب کمیشن میں بھی اصلاحات کی جا رہی ہیں۔
ان کا کہنا تھا کہ صوبے میں وزرا پر قانونی طور پر کاروبار کرنے پر پابندی عائد ہے۔
صوبے میں چلنے والی ڈولی لفٹس کے حوالے سے ان کا کہنا تھا کہ صوبے میں ڈولی لفٹیں نجی طور پر چلائی جا رہی ہیں تاہم ان کی چھان بین کی جارہی ہے۔
اس موقع پر علی امین گنڈا پور کا کہنا تھا کہ چیئرمین تحریک انصاف نے جماعت کو کرپشن سے پاک کرنے کے لیے احتساب کمیٹی بنانے کا فیصلہ کیا ہے جس کا با ضابطہ اعلان عمران خان جلد کریں گے۔
ان کا کہنا تھا کہ یہ احتساب کمیٹی پارٹی کارکنوں اور رہنماؤں سمیت تنظیمی ذمہ داروں کا احتساب کرے گی۔
انھوں نے کہا کہ پاکستان تحریک انصاف اپنے منشور پر کوئی سمجھوتہ نہیں کرے گی جبکہ عمران خان کے پی حکومت کو کرپشن سے پاک کرنا چاہتے ہیں۔
لائیو ٹی وی