بھارتی کرکٹ ٹیم کے کپتان اور مایہ ناز بلے باز 29 سالہ ویرات کوہلی اور بولی وڈ کی خوبرو اداکارہ 29 سالہ انوشکا شرما کے درمیان قربتیں نئی بات نہیں۔

بولی وڈ اداکارہ اور کرکٹر کے درمیان گزشتہ 5 سال سے تعلقات قائم ہیں، تاہم ان میں کبھی تلخیاں، کبھی دوریاں تو کبھی محبتیں آتی جاتی رہیں۔

گزشتہ ہفتے ہی ویرات کوہلی اور انوشکا شرما شادی کے ملبوسات تیار کرنے والے بھارتی برانڈ کے ایک اشتہار میں ایک ساتھ نظر آئے تھے۔

شادی کے موقع پر بنائے گئے اس اشتہار میں ویرات کوہلی اور انوشکا شرما کو بھی دولہا اور دلہن کے لباس میں دکھایا گیا تھا، جو ایک دوسرے سے کئی وعدے کرتے نظر آتے ہیں۔

اشتہار کے بعد دونوں کے مداحوں نے انہیں جوڑے کے روپے میں دیکھنے کی خواہش کا اظہار کرتے ہوئے کہا کہ انہیں جلد سے جلد شادی کردینی چاہیے۔

ابھی اس اشتہار کو ایک ہفتہ ہی ہوا تھا کہ یہ خبریں سامنے آئی ہیں کہ ویرات کوہلی اور انوشکا شرما دسمبر میں شادی کرنے جا رہے ہیں۔

انڈین ایکسپریس نے اپنے مختلف ذرائع سے بتایا کہ انوشکا شرما اور ویرات کوہلی نے 2018 سے پہلے شادی کا فیصلہ کرلیا۔

خبر میں دعویٰ کیا گیا کہ اگر ذرائع کی خبریں سچ ثابت ہوئیں تو کرکٹر اور اداکارہ دسمبر 2017 میں شادی کے بندھن میں بندھ جائیں گے۔

یہ بھی پڑھیں: ’شادی‘ پر ویرات کوہلی اور انوشکا شرما کے’نئے وعدے‘

این ڈی ٹی وی نے بھی اپنی خبر میں بتایا کہ ویرات کوہلی نے بھارت کے کرکٹ بورڈ سے ذاتی وجوہات کی بناء پر دسمبر میں آرام کرنے کے لیے درخواست کی ہے۔

خبر کے مطابق ویرات کوہلی نے بی سی سی آئی کو بتایا کہ انہیں سری لنکا کے ساتھ ٹیسٹ اور ون ڈے سیریز کے دوران آرام کا موقع دیا جائے، کرکٹر نے آرام کی وجہ شادی نہیں بتائی، تاہم خبریں ہیں وہ شادی کے لیے چھٹیاں لینا چاہتے ہیں۔

این ڈی ٹی وی کے مطابق دسمبر میں کرکٹر اور اداکارہ کی شادی سے متعلق ہونے والی چہ مگوئیوں کے بعد جب انوشکا شرما کی ٹیلنٹ ایجنسی سے رابطہ کیا گیا تو انہوں نے ان خبروں کو افواہ قرار دیتے ہوئے انہیں جھوٹا قرار دیا۔

تاہم دوسری جانب کرکٹ بورڈ کے قریبی ذرائع اس بات پر بضد ہیں کہ ویرات کوہلی اور انوشکا شرما دسمبر میں شادی کرنے جا رہے ہیں۔

مزید پڑھیں: انوشکا اور ویرات جلد شادی کرنے والے ہیں

خیال رہے کہ ویرات کوہلی اور انوشکا شرما کے درمیان 2012 سے تعلقات قائم ہیں، دونوں کو متعدد بار بیرون ممالک ایک ساتھ چھٹیاں گزارنے سمیت مختلف پارٹیوں اور ایوارڈز تقریب میں بھی ایک ساتھ دیکھا گیا ہے۔

انڈین پریمیئر لیگ (آئی پی ایل) سمیت دیگر کرکٹ سیریز کے درمیان بھی انوشکا شرما اور ویرات کوہلی کو ایک ساتھ دیکھا گیا، جس پر دونوں کو تنقید کا نشانہ بھی بنایا جاتا رہا۔

دونوں کے درمیان گزشتہ برس تلخیاں بڑھ گئیں تھیں، تاہم رواں برس ایک بار پھر دونوں ایک دوسرے کے قریب دیکھے گئے، اور گزشتہ ہفتے ہی وہ ایک اشتہار میں ایک ساتھ نظر آئے۔