نوکیا کے ایک اور پرانے فون کی نئی شکل میں واپسی

25 فروری 2018

ای میل

بارسلونا میں ہر سال موبائل ورلڈ کانگریس کے دوران مختلف کمپنیاں اپنے نئے اسمارٹ فونز کے ساتھ آتی ہیں مگر ایچ ایم ڈی گلوبل نے گزشتہ سال 3310 کے جدید ورژن کو متعارف کراکے میلہ لوٹ لیا تھا۔

اور اس سال بھی نوکیا فونز کی فروخت کا لائسنس رکھنے والی کمپنی نے یہی طریقہ کار اپناتے ہوئے نوے کی دہائی کے ایک اور مقبول فون نوکیا 8110 کو نئی زندگی دی ہے۔

فوٹو بشکریہ نوکیا
فوٹو بشکریہ نوکیا

مزید پڑھیں : نوکیا 3310 کی واپسی

جی ہاں 3310 کے بعد نوکیا کا دو دہائی قبل کا مقبول فون پھر 8110 ری لوڈڈ کے نام سے متعارف کرایا گیا ہے اور ہوسکتا ہے آپ نے اس فون کو 1999 کی سپرہٹ فلم دی میٹرکس میں بھی دیکھا ہو۔

اسکرین شاٹ
اسکرین شاٹ

اس کا بنانا ایڈیشن یا کیلے کی شکل کا ایڈیشن بھی بہت مقبول ہوا تھا اور اب نئے ورژن میں ماضی کے فون کی خصوصیات کے ساتھ جدید فیچرز جیسے فور جی کو بھی ڈیوائس کا حصہ بنایا گیا ہے۔

3310 کی طرح یہ نیا 8110 بھی بیس سال پرانے فون کی ہو بہو نقل نہیں بس کیلے جیسا ڈیزائن ضرور نظر آتا ہے مگر پرانے فون کا انٹینا اب ختم کردیا گیا ہے۔

اس کا ڈسپلے بھی کلر کردیا گیا ہے جبکہ جدید ایپس جیسے جی میل، آﺅٹ لک اور فیس بک کا اضافہ بھی کردیا گیا ہے تاہم اس میں اینڈرائیڈ کی بجائے اسمارٹ فیچر آپریٹنگ سسٹم دیا گیا ہے۔

اور ہاں اس میں اسنیک گیم کا نیا ورژن بھی موجود ہے کیونکہ پرانے فونز تو اس گیم کے بغیر نامکمل سمجھے جاتے تھے۔

اس میں ماضی کی طرح سلائیڈ کرکے فون کالز ریسیو کرنے کا فیچر بھی موجود ہے۔

یہ بھی پڑھیں : پرانے اور نئے نوکیا 3310 میں کیا فرق ہے؟

اس فون میں کوالکوم 205، 1.1 گیگا ہرٹز پراسیسر، 512 ایم بی ریم اور 4 جی بی اسٹوریج دی گئی ہے تاہم اس میں اضافہ ممکن نہیں۔

فوٹو بشکریہ سی نیٹ ڈاٹ کام
فوٹو بشکریہ سی نیٹ ڈاٹ کام

جیسا کہ بتایا جاچکا ہے کہ یہ فور جی فون ہے تو انٹرنیٹ سرفنگ ممکن ہے۔

سب سے خاص بات اس کی 1500 ایم اے ایچ بیٹری ہے جو کہ کمپنی کے مطابق 25 دن تک ایک چارج پر اسٹینڈ بائی پر چل سکتی ہے۔

2.4 انچ کے کلر ڈسپلے میں کیو وی جی اے ریزولوشن دیا گیا ہے جبکہ دو میگاپکسل کیمرہ بیک پر موجود ہے۔

یہ فون آنے والے ہفتوں میں دنیا بھر میں فروخت کے لیے پیش کردیا جائے گا ، جس کی قیمت 79 یورو (دس ہزار 7 سو پاکستانی روپے سے زائد) رکھی گئی ہے۔