وفاقی کابینہ نے کراچی میں بجلی کی تقسیم کار کمپنی کے الیکٹرک میں کے ایس ای پاور لمیٹڈ کے شیئر کی فروخت کے لیے چینی کمپنی کو نیشنل سیکیورٹی سرٹیفکیٹ کے اجرا کرنے کا فیصلہ کرلیا۔

سرکاری خبر رساں ادارے ایسوسی ایٹڈ پریس پاکستان (اے پی پی) کے مطابق وزیراعظم شاہد خاقان عباسی کی زیر صدارت نجکاری کے بارے میں کابینہ کمیٹی برائے نجکاری کا اجلاس وزیراعظم آفس میں منعقد ہوا۔

اجلاس میں کے ای ایس پاور لمیٹڈ کی جانب سے کے الیکٹرک لمیٹڈ میں اس کے حصص کی شنگھائی الیکٹرک پاور کو فروخت کے معاملے پر غور کیا گیا جبکہ اس میں وفاقی کابینہ کی توثیق سے مشروط نیشنل سیکورٹی سرٹیفکیٹ کے اجرا کا فیصلہ کیا گیا۔

کابینہ کمیٹی برائے نجکاری نے پاکستان اسٹیل ملز لمیٹڈ کی نجکاری اور پی آئی اے سی ایل کی تشکیل نو سے متعلق مختلف امور کا بھی جائزہ لیا۔

کمیٹی نے سپانسرنگ ڈویژنوں سے کہا کہ وہ اس بارے میں پہلے کے فیصلوں کی روشنی میں جامع اور مربوط انداز میں تجاویز دوبارہ پیش کریں۔

ڈان اخبار کی رپورٹ کے مطابق اس سرٹیفکیٹ کا تعلق کے الیکٹرک پر وجب الادا اربوں روپے کے قرضوں سے ہے جس کی منظوری نیپرا دے گا۔

خیال رہے کہ سعودی عرب کا الجومائح گروپ، کویت کا نیشنل انڈسٹریز گروپ اور متحدہ عرب امارات (یو اے ای) کی کمپنی کے شراکت داری میں کے الیکٹرک کے 66.4 فیصد شیئر کے مالک ہیں۔